തിരുവനന്തപുരം: തെരുവില് അന്തിയുറങ്ങുന്നവരെ കണ്ടെത്താന് ദേശീയ നഗര ഉപജീവന ദൗത്യം (എന്യുഎല്എം) നടത്തിയ സര്വ്വേ പൂര്ത്തിയായി. കേരളത്തിലാകെ 93 നഗരസഭകളി ലായി 3195 പേര് പൊതുസ്ഥലത്ത് അന്തിയുറങ്ങുന്നതായി കണ്ടെത്തി.
കുടുംബശ്രീ മുഖേന കേരളത്തില് നടപ്പിലാക്കുന്ന ദേശീയ നഗര ഉപജീവന ദൗത്യം ഇത്തരക്കാര്ക്കായി സുസ്ഥിര അഭയകേന്ദ്രങ്ങള് ഒരുക്കി നല്കും. തെരുവി ലുറങ്ങുന്നവരില് 2625 പേര് പുരുഷന്മാരും 564 പേര് സ്ത്രീകളും ആറ് പേര് ട്രാന്സ്ജെന്ഡേഴ്സുമാണ്. ഒരു വര്ഷത്തിലേറെയായി തെരുവിലുറങ്ങുന്നവരുടെ എണ്ണം 2106 ആണ്.
ഏറ്റവും കൂടുതല് പേര് തെരുവിലുറങ്ങുന്ന നഗരം കോഴിക്കോട് കോര്പ്പറേ ഷനാണ്, ജില്ലയില് എറണാകുളവും. നഗരങ്ങളില് തെരുവിലുറങ്ങുന്നവരില് 61 ശതമാനവും കോഴിക്കോട്, കൊച്ചി, തിരുവനന്തപുരം, സുല്ത്താന് ബത്തേരി, കണ്ണൂര്, കൊല്ലം, തൃശ്ശൂര്, കോട്ടയം, പാലക്കാട്, തലശ്ശേരി, വടകര, കുന്നംകുളം, ആലപ്പുഴ, ചാലക്കുടി, കല്പ്പറ്റ, കാസര്ഗോഡ്, അങ്കമാലി എന്നിവിടങ്ങളിലാണ്.
ഇതില് 1465 പേരും കൂലി വേല ചെയ്യുന്നവരാണ്. തെരുവിലുറങ്ങുന്നവരില് പകുതിയോളം 41നും 60നും ഇടയില് പ്രായമുള്ളവരാണ്. പൊതുസ്ഥലത്ത് അന്തിയുറങ്ങുന്നവര് ഏറ്റവും കുറവുള്ള ജില്ല ഇടുക്കിയാണ്, 38 പേര്. പത്തനംതിട്ടയിലും (59) കാസര്ഗോഡും (68) പൊതുനിരത്തിലുറങ്ങുന്നവര് താരതമ്യേന കുറവാണ്. നേരത്തേ സംസ്ഥാനത്തെ 14 നഗരസഭകളില് നടത്തിയ പ്രാരംഭ സര്വേകളില്, തെരുവിലുറങ്ങുന്ന ഇരുനൂറ്റമ്പതോളം പേരെ കണ്ടെത്തിയിരുന്നു.
ദേശീയ നഗര ഉപജീവന ദൗത്യം സിറ്റി മിഷന് മാനേജ്മെന്റ് യൂണിറ്റിലെ അംഗങ്ങളും കോര്പ്പറേഷന്, മുനിസിപ്പാലിറ്റി എന്നിവിടങ്ങളിലെ ആരോഗ്യ വിഭാഗം ജീവനക്കാരും പോലീസും ഉള്പ്പെടുന്ന സംഘമാണ് സര്വ്വേ നടത്തിയത്.
