കണ്ണൂര്: ഒരു കാലഘട്ടത്തില് എല്ലാ മേഖലയിലും പിന്നിലായിരുന്ന കേരളത്തില് മാറ്റം കൊണ്ടുവന്നത് സാമൂഹ്യ പരിഷ്കര്ത്താക്കളുടെ പ്രവര്ത്തനമാണെന്ന് മുന് ഡിജിപി അലക്സാണ്ടര് ജേക്കബ്. ശ്രീനാരായണ ഗുരു, അയ്യങ്കാളി തുടങ്ങിയവരുടെ പ്രവര്ത്തനമാണ് കേരളത്തെ മുന്നിരയിലത്തിച്ചത്. വിദ്യാഭ്യാസ മേഖലയില് സമൂലമായ പരിവര്ത്തനം കൊണ്ടുവന്നത് സാമൂഹ്യ പരിഷ്കര്ത്താക്കളാണ്. പിന്നീട് ദേശീയ പ്രസ്ഥനങ്ങള് പരിഷ്കരണത്തിന്റെ നേതൃത്വമേറ്റെടുത്തു. കേരള പോലീസ് ഓഫീസേഴ്സ് അസോസിയേഷനും കേരള പോലീസ് അസോസിയേഷനും സംയുക്തമായി ‘കേരളം ഇന്ത്യക്ക് വഴികാട്ടി-കേരള പോലീസിന്റെ പങ്ക്’ എന്ന വിഷയത്തില് കണ്ണൂര് ചേമ്പര് ഹാളില് നടത്തിയ സെമിനാറില് സംസാരിക്കുകയായിരുന്നു അദ്ദേഹം.
കേരളം ഭ്രാന്താലയമാണന്ന് സ്വാമി വിവേകാനന്ദന് പറഞ്ഞത് കേരളത്തന്റെ അന്നത്തെ സാഹചര്യം മനസ്സിലാക്കിയാണ്. എന്നാല് ഇന്ന് കേരളം ഇന്ത്യയിലെ മറ്റ് സംസ്ഥാനങ്ങളെ അപേക്ഷിച്ച് വിവിധ മേഖലകളില് ഒന്നാം സ്ഥാനത്താണെന്ന് നമുക്ക് കാണാന് സാധിക്കും. വിദ്യാഭ്യാസ, ആരോഗ്യ, ഭൂപരിഷ്കരണ മേഖലകളിലെല്ലാം തന്നെ കേരളം ഏറെ മുന്നോട്ട് പോയത് സമാധാനപരമായാണ്. ഇത്തരം പരിവര്ത്തനങ്ങളില് പോലീസിന്റെ പങ്ക് സ്തുത്യര്ഹമാണെന്നും അദ്ദേഹം പറഞ്ഞു.
സ്വാതന്ത്ര്യത്തിന് മുന്പ് പ്രമാണിമാരെ അനുസരിച്ചാണ് പോലീസ് പ്രവര്ത്തിച്ചത്. അന്ന് എല്ലാവര്ക്കും നീതി ലഭിച്ചിരുന്നില്ല. അടിച്ചമര്ത്തലുകള്ക്ക് പോലീസ് തന്നെ കൂട്ടുനിന്നു. എന്നാല് സ്വാതന്ത്ര്യത്തിന് ശേഷം പോലീസിന്റെ പ്രവര്ത്തനവും മാറി. കേരളത്തില് രക്തച്ചൊരിച്ചിലില്ലാതെ സമാധാനപരമായി മാറ്റങ്ങള് കൊണ്ടുവന്നത് കേരളാ പോലീസിന്റെ നേട്ടമാണെന്നും അലക്സാണ്ടര് ജേക്കബ് പറഞ്ഞു.
കെ.കെ.രാഗേഷ് എംപി ഉദ്ഘാടനം ചെയ്തു. സിഐ ടി.കെ.രത്നകുമാര് അധ്യക്ഷത വഹിച്ചു. ഡിവൈഎസ്പി പി.പി.സദാനന്ദന്, സി.ആര്.ബിജു, പി.ജി.അനില്കുമാര് തുടങ്ങിയവര് സംസാരിച്ചു. കെ.രാജേഷ് സ്വാഗതവും ടി.പ്രജീഷ് നന്ദിയും പറഞ്ഞു.
