ഇരിട്ടി: തലശേരി വളവുപാറ റോഡ്, എയര്പോര്ട്ട്, ഫഌറ്റ്, ഭവനനിര്മാണം തുടങ്ങി ഒട്ടനവധി നിര്മാണ പ്രവൃത്തികള് നടക്കുന്ന സാഹചര്യത്തില് ദീര്ഘനാളുകളായി പ്രവര്ത്തിച്ചുകൊണ്ടിരുന്ന ക്വാറി, ക്രഷര് എന്നിവയുടെ സ്തംഭനാവസ്ഥ മാറ്റാന് നടപടി സ്വീകരിക്കണമെന്ന് സംയുക്ത ടിപ്പര് തൊഴിലാളി യൂണിയന് ഇരിട്ടി മേഖലാ കമ്മിറ്റി ആവശ്യപ്പെട്ടു.
ഇരിട്ടി മേഖലയില് എട്ട് ക്രഷറുകള് പ്രവര്ത്തിച്ചിരുന്നതില് ഇപ്പോള് കാര്യക്ഷമമായി പ്രവര്ത്തിക്കുന്നത് രണ്ടെണ്ണം മാത്രമാണ്. കൊട്ടിയൂരില് ഒരു ക്രഷറിന് സ്റ്റേ വരികയും വയനാട് ജില്ലയിലെ ക്വാറി, ക്രഷര് പ്രവര്ത്തനം നിലയ്ക്കുകയും ചെയ്തതോടെ ഇവിടെനിന്നുള്ള ആവശ്യക്കാരും ഇരിട്ടി മേഖലയിലേക്ക് വന്നതോടെ ക്രഷര് ഉല്പന്നങ്ങള്ക്ക് കൂടുതല് ക്ഷാമം അനുഭവിക്കുകയാണ്. ഇതുമൂലം പൊതുമരാമത്ത് പ്രവൃത്തികള് ഇഴഞ്ഞുനീങ്ങുകയും നിര്മാണ മേഖല, ക്വാറി, ക്രഷര്, ടിപ്പര് വിഭാഗങ്ങളിലെ ആയിരകണക്കിന് തൊഴിലാളികള് സാമ്പത്തിക പ്രതിസന്ധിയിലായിരിക്കുകയാണ്.
പശ്ചിമഘട്ടത്തിന്റെ പേരില് മുറവിളി കൂട്ടുന്നവരും പ്രകൃതിസ്നേഹികളും സാധാരണക്കാരായ തൊഴിലാളികളുടെയും കുടുംബത്തിന്റെയും ജീവിത സാഹചര്യങ്ങളെകുറിച്ചും മനസിലാക്കുന്നില്ല. പൂട്ടികിടക്കുന്ന ക്വാറികളും ക്രഷറുകളും തുറന്ന് പ്രവര്ത്തിക്കുന്നതിനാവശ്യമായ നടപടി ഉണ്ടായില്ലെങ്കില് ഈ മേഖലയില് തൊഴില് നഷ്ടപ്പെടുന്നവരെ സംഘടിപ്പിച്ച് പട്ടിണി സമരവും മറ്റ് പ്രതിഷേധ മാര്ഗങ്ങളും സ്വീകരിക്കേണ്ടി വരുമെന്നും യോഗം അറിയിച്ചു. പ്രസിഡന്റ് വി.മുരളീധരന്, പ്രസാദ് കീര്ത്തനം, ഉണ്ണി കേളംപീടിക, തങ്കച്ചന് മുള്ളന്കുഴിയില്, ജയന് വടവതി എന്നിവര് പ്രസംഗിച്ചു.
