പലെക്കലെ: ടെസ്റ്റ് പരമ്പര തൂത്തുവാരിയ കോഹ്ലിയും കൂട്ടരും അഞ്ചു മത്സരങ്ങളുടെ ഏകദിന പരമ്പരയും പോക്കറ്റിലാക്കാന് ഇറങ്ങുന്നു. നിര്ണായകമായ ഇന്ത്യ- ശ്രീലങ്ക മൂന്നാം ഏകദിനം ഇന്ന് ഇവിടെ നടക്കും. ഉച്ചകഴിഞ്ഞ് 2.30ന് മത്സരം ആരംഭിക്കും. ഇന്ന് ജയിച്ചാല് പരമ്പര ഇന്ത്യയ്ക്ക് സ്വന്തമാകും. ആദ്യ രണ്ട് മത്സരങ്ങളിലും വിജയം നേടിയ ഇന്ത്യ പരമ്പരയില് 2-0 ന് മുന്നിട്ടുനില്ക്കുകയാണ്.
മികച്ചഫോം നിലനിര്ത്തുന്ന ഇന്ത്യയ്ക്ക് തന്നെയാണ് മത്സരത്തില് മുന്തൂക്കം. രണ്ടാം മത്സരത്തില് 131 റണ്സിന് ഏഴുവിക്കറ്റുകള് നഷ്ടമായി തകര്ന്നടിഞ്ഞ ഇന്ത്യ പരിചയ സമ്പന്നനായ ധോണിയുടെയും പേസര് ഭുവനേശ്വറിന്റെയും ബാറ്റുകളില് തൂങ്ങി വിജയത്തിന്റെ പടവുകള് കയറി. പുതുമുഖങ്ങള്ക്ക് അവസരങ്ങള് നല്കണമെന്ന സമീപനം നായകന് കോഹ് ലി തുടരുമെന്നാണ് പ്രതീക്ഷ. അതിനാല് യുവതാരങ്ങളായ യുവേന്ദ്ര ചഹലും അക് ഷര് പട്ടേലും അവസാന ഇലവനില് കളിക്കും.
ബാറ്റിങ്ങ് ഓര്ഡറില് മാറ്റംവരുത്തിയ പരീക്ഷണം തകര്ന്ന സാഹചര്യത്തില് കോഹ്ലി ഇത് തുടരാന് സാധ്യതയില്ല. രണ്ടാം മത്സരത്തില് അഞ്ചാമനായി ഇറങ്ങിയ കോഹ്ലി തന്റെ് സ്ഥിരം സ്ഥാനമായ മൂന്നാം നമ്പറില് ഇന്ന് കളിക്കാനിറങ്ങാനാണ് സാധ്യത.പര്യടനത്തില് തുടര്ച്ചയായി അഞ്ചാം തവണ ടോസ് നേടിയ കോഹ്ലി ഇന്നും ടോസ് നേടിയാല് ശ്രീലങ്കയെ ബാറ്റിങ്ങിന് ക്ഷണിച്ചേക്കും. രണ്ടാം മത്സരത്തിലെ ടീമിനെ തന്നെ ഇന്ത്യ നിലനിര്ത്തും.
അതേസമയം ശ്രീലങ്കന് ടീമില് മാറ്റങ്ങള് പ്രതീക്ഷിക്കാം. സസ്പെന്ഡ് ചെയ്യപ്പെട്ട ക്യാപ്റ്റന് ഉപുല് തരംഗയ്ക്ക് പകരം ചമര കപുഗദരയാണ് ടീമിനെ നയിക്കുക. ടീമിലേക്ക് മടങ്ങിയെത്തിയ ടെസ്റ്റ് ക്യാപ്റ്റന് ദിനേശ് ചാണ്ടിമല് അവസാന ഇലവനില് കളിക്കും. ഫോം നേടാന് വിഷമിക്കുന്ന ചാണ്ടിമല് നാലാമനായി ബാറ്റിങ്ങിനിറങ്ങും. ഓപ്പണറുടെ റോളിലും മാറ്റമുണ്ടാകും. പുതുതായി ടീമിലെത്തിയ ലാഹിരു തിരിമാനെ നിരോഷന് ഡിക്ക്വെല്ലയ്ക്കൊപ്പം ഇന്നിങ്ങ്സ് ഓപ്പണ് ചെയ്യും. ടീമിന്റെ ആത്മവിശ്വാസം കെട്ടിട്ടില്ലെന്നും പരമ്പരയിലെ ഒരു മത്സരത്തിലെങ്കിലും വിജയിക്കാനാകുമെന്ന് പകരക്കാരനായ ശ്രീലങ്കന് ക്യാപ്റ്റന് ചമര കപുഗദേര പറഞ്ഞു.
