മഹിളാ ഐക്യവേദിയുടെ ആഭിമുഖ്യത്തില് സെക്രട്ടേറിയറ്റിനു മുന്നില് നടന്ന ധര്ണ്ണ സംസ്ഥാന ജനറല് സെക്രട്ടറി ബിന്ദു മോഹന് ഉദ്ഘാടനം ചെയ്യുന്നു
തിരുവനന്തപുരം: പുതിയ മദ്യനയം 15 മുതല് 30 വയസുവരെയുള്ള കുട്ടികളെയാണ് ദോഷകരമായി ബാധിക്കുകയെന്നും ഇത് നാട്ടില് അരാജകത്വം സൃഷ്ടിക്കുമെന്നും മഹിളാ ഐക്യവേദി സംസ്ഥാന ജനറല് സെക്രട്ടറി ബിന്ദു മോഹന് പറഞ്ഞു. കുടുംബനാഥന്മാരെ നഷ്ടപ്പെടുത്തിയിട്ട് കുടുംബത്തിന് നഷ്ടപരിഹാരം നല്കുന്നതില് അര്ത്ഥമുണ്ടോ എന്നും അവര് ചോദിച്ചു. വനിതാ മന്ത്രിമാരും എംഎല്എമാരും പുതിയ മദ്യനയം പിന്വലിക്കാന് സര്ക്കാരില് സമ്മര്ദ്ദം ചെലുത്തണമെന്നും അവര് ആവശ്യപ്പെട്ടു.
മഹിളാ ഐക്യവേദിയുടെ ആഭിമുഖ്യത്തില് സെക്രട്ടേറിയറ്റിനു മുന്നില് നടന്ന ധര്ണ്ണ ഉദ്ഘാടനം ചെയ്യുകയായിരുന്നു ബിന്ദു മോഹന്. ക്ഷേത്ര സ്വത്തുക്കള് ഭൂമാഫിയകള്ക്കും ഇഷ്ടക്കാര്ക്കും തീറെഴുതിക്കൊടുത്തും ക്ഷേത്ര വരുമാനം ഭീകരവാദം വളര്ത്തുന്ന മദ്രസ അദ്ധ്യാപകര്ക്ക് ശമ്പളം നല്കിയും സര്ക്കാര് ഹൈന്ദവ വിരുദ്ധത പ്രകടിപ്പിക്കുകയാണ്. വോട്ട് ബാങ്ക് ലക്ഷ്യമാക്കി പ്രവര്ത്തിക്കുമ്പോഴും ഭൂരിപക്ഷത്തിന്റെ വോട്ട് ഉണ്ടെങ്കില് മാത്രമേ അധികാരത്തില് എത്താന് സാധിക്കൂ എന്നുകൂടി ഓര്ക്കണമെന്നും ബിന്ദു മോഹന് പറഞ്ഞു.
സഹകാര് ഭാരതി സംസ്ഥാന സെക്രട്ടറി എം.എസ്. ജയ, ഹിന്ദു ഐക്യവേദി സംസ്ഥാന ട്രഷറര് അരവിന്ദാക്ഷന്, ജില്ലാ ജനറല് സെക്രട്ടറി വഴയില ഉണ്ണി, ബിജെപി ജില്ലാ സെക്രട്ടറി എം.ബി. അഞ്ജന, മഹിളാ ഐക്യവേദി ജില്ലാ പ്രസിഡന്റ് നിര്മ്മല കുമാരി, ജില്ലാ ജനറല് സെക്രട്ടറി സൂര്യ പ്രേം, ജില്ലാ സംയോജകന് ശിവശങ്കരപ്പിള്ള, സഹ സംയോജകന് പ്രേം കുമാര് എന്നിവര് സംസാരിച്ചു.
സ്ത്രീ സുരക്ഷാ വകുപ്പ് നടപ്പിലാക്കുക, ഓണം മദ്യവിമുക്തമാക്കുക, രാഷ്ട്രീയ അക്രമങ്ങളില് ജീവന് നഷ്ടപ്പെട്ടവരുടെ കുടുംബങ്ങള്ക്ക് ധനസഹായം നല്കുക, ആനുകൂല്യങ്ങളിലെ മതവിവേചനം അവസാനിപ്പിക്കുക എന്നീ ആവശ്യങ്ങള് ഉന്നയിച്ചായിരുന്നു ധര്ണ്ണ. തുടര്ന്ന് നിവേദനവുമായി മുഖ്യമന്ത്രിയെ കാണാന് എത്തിയ മഹിളാ ഐക്യവേദി നേതാക്കളോട് വരും ദിവസത്തില് സമഗ്രമായ ചര്ച്ചയ്ക്ക് അവസരം ഒരുക്കാമെന്ന് മുഖ്യമന്ത്രിയുടെ ഓഫീസ് അറിയിച്ചു.
