അഴീക്കോട്: ദയ ചാരിറ്റബിള് ട്രസ്റ്റിന്റെ ആഭിമുഖ്യത്തില് ലോക ഹ്യൂമാനിറ്റേറിയന് ദിനാഘോഷം സംഘടിപ്പിച്ചു. ദിനാഘോഷത്തിന്റെ ഭാഗമായി മനുഷ്യസ്നേഹികളെ ആദരിക്കലും ജീവകാരുണ്യ പ്രവര്ത്തനങ്ങളും സംഘടിപ്പിച്ചു.
ചാലില് ഗവ.വൃദ്ധമന്ദിരത്തില് നടന്ന പരിപാടി സംഗീതരത്നം കാഞ്ഞങ്ങാട് രാമചന്ദ്രന് ഉദ്ഘാടനം ചെയ്തു.
കഴിഞ്ഞ പത്ത് വര്ഷത്തിനുള്ളില് അറുപതോളം ജീവന് രക്ഷിച്ച പയ്യാമ്പലത്തെ ലൈഫ് ഗാര്ഡ് ചാള്സണ് ഏഴിമല, കാന്സര് രോഗികള്ക്ക് സാന്ത്വനവും ചികിത്സയും പകരുന്ന മലബാര് കാന്സര് കെയര് സൊസൈറ്റി ചെയര്മാന് ഡി.കൃഷ്ണനാഥ പൈ, കടലില് അകപ്പെട്ട അമ്മയെയും കുട്ടിയെയും രക്ഷിച്ച് രാഷ്ട്രപതിയുടെ അവാര്ഡിന് അര്ഹനായ നമ്പോലന് രതീശന് എന്നിവരെയാണ് ആദരിച്ചത്. സാമൂഹ്യ പ്രവര്ത്തനം നടത്തുന്ന ക്ലബ്ബുകള്ക്ക് തുടര് പ്രവര്ത്തനത്തിനായി സഹായധനവും നല്കി. കാഞ്ഞങ്ങാട് രാമചന്ദ്രന്റെയും സംഘത്തിന്റെയും നേതൃത്വത്തില് സംഗീതകച്ചേരിയും ഉണ്ടായിരുന്നു.
ദയ ചാരിറ്റബിള് ട്രസ്റ്റ് ആന്റ് ദയ മെഡിക്കല്സ് ചെയര്മാന് എന്.കെ.സൂരജ്, മാധവറാവു സിന്ധ്യ ട്രസ്റ്റ് ചെയര്മാന് കെ.പ്രമോദ്, സാമൂഹ്യ വകുപ്പ് ഓഫീസര് മോഹന്ദാസ്, ബ്ലോക്ക് പഞ്ചായത്ത് പ്രസിഡണ്ട് കുടുവന് പത്മനാഭന്, വൃദ്ധമന്ദിരം സൂപ്രണ്ട് പവിത്രന് തൈക്കണ്ടി, പാറക്കുനി ദാമോദരന്, എം.എന്.രവീന്ദ്രന് എന്നിവര് സംസാരിച്ചു.
