കൊച്ചി: കൊച്ചി താലൂക്കില് ജില്ലാകളക്ടര് കെ മുഹമ്മദ് വൈ സഫീറുള്ളയുടെ നേതൃത്വത്തില് നടത്തിയ ജനസമ്പര്ക്ക പരിപാടിയില് ‘പരിഹാരം 2017’ 450 പരാതികള് പരിഗണിച്ചു. ഇതില് നേരത്തെ ഓണ്ലൈനായി ലഭിച്ച 183 പരാതികളില് 159 എണ്ണം തീര്പ്പാക്കി. ബാക്കിയുള്ള 24 പരാതികള് തുടര്നടപടികള്ക്കായി വിവിധ വകുപ്പുകളിലേക്ക് അയച്ചു.
ഓണ്ലൈനായി ലഭിച്ച പരാതികളില് 122 എണ്ണം റവന്യൂ വകുപ്പുമായി ബന്ധപ്പെട്ടതായിരുന്നു. 267 പരാതികളാണ് ജനസമ്പര്ക്ക വേദിയായ ചുള്ളിക്കല് ശ്രീനാരായണ ഹാളില് തയ്യാറാക്കിയ അഞ്ചു കൗണ്ടറുകളില് ലഭിച്ചത്. ഇവ അതത് വകുപ്പുദ്യോഗസ്ഥരുടെ പരിഗണനയ്ക്കും ഉടന് തീരുമാനത്തിനുമായി കൈമാറി.
നേരിട്ടു ലഭിച്ച 267 പരാതികളില് 122 എണ്ണം റവന്യു വകുപ്പുമായി ബന്ധപ്പെട്ടതാണ്. പഞ്ചായത്തുമായി ബന്ധപ്പെട്ട് 68 പരാതികളും ബാങ്കുകളുമായി ബന്ധപ്പെട്ട് 12 പരാതികളും ലഭിച്ചു. മോട്ടോര് വാഹനവകുപ്പുമായി ബന്ധപ്പെട്ട് എട്ട് പരാതികളും മറ്റുള്ള വകുപ്പുകളുമായി ബന്ധപ്പെട്ട് 57 പരാതികളും ലഭിച്ചു.
ഭൂമി സര്വേ, പോക്കുവരവ് സംബന്ധിച്ച പരാതികള് പരിശോധിച്ച് നടപടികള് വേഗത്തിലാക്കി റിപ്പോര്ട്ടു നല്കാന് ജില്ലാ കളക്ടര് വകുപ്പുദ്യോഗസ്ഥരോട് ആവശ്യപ്പെട്ടു. താലൂക്കുതലത്തില് സംഘടിപ്പിക്കുന്ന പരിഹാരത്തിന്റെ എട്ടാം ഘട്ടമാണ് ഇന്നലെ നടന്നത്.
പൊതുജനങ്ങള്ക്ക് വിവിധ പദ്ധതികളെക്കുറിച്ചുള്ള സംശയങ്ങള് പരിഹരിക്കാന് പരിഹാരം വേദി സഹായിക്കുമെന്ന് പരിപാടി ഉദ്ഘാടനം ചെയ്ത ജില്ലാ കളക്ടര് പറഞ്ഞു. ഇ-ഗവേണന്സ് സംവിധാനത്തിലൂടെ ഭരണസംവിധാനത്തിലെ സുതാര്യതയും വേഗവും ഉറപ്പാക്കാം. ഇതിന്റെ ഭാഗമായി ജില്ലയിലെ 73 വില്ലേജുകളില് ഓണ്ലൈന് പോക്കുവരവ് നടപ്പാക്കി. ആഗസ്റ്റില് ജില്ലയിലെ എല്ലാ വില്ലേജുകളിലും ഓണ്ലൈന് പോക്കുവരവു സംവിധാനം നിലവില് വരുമെന്ന് ജില്ലാ കളക്ടര് അറിയിച്ചു. ജില്ലയിലെ
ജനസമ്പര്ക്ക പരിപാടിക്കു മുമ്പു രണ്ടു ഫയല് അദാലത്തുകള് നടത്തുകയുണ്ടായി. മുഖ്യമന്ത്രിയുടെ ദുരിതാശ്വാസനിധിയിലേക്കുള്ള അപേക്ഷകള്, സര്വേ, പോക്കുവരവ്, പട്ടയം തുടങ്ങിയ റവന്യു വിഷയങ്ങള് എന്നിവ സംബന്ധിച്ച 3000-ഓളം ഫയലുകളില് തീര്പ്പാക്കിയ ശേഷമാണ് ജനസമ്പര്ക്ക പരിപാടി ആരംഭിച്ചത്.
താലൂക്കുതലത്തില് നടത്തുന്ന ജനസമ്പര്ക്ക പരിപാടിയിലൂടെ പൊതുജനങ്ങളുടെ പ്രശ്നങ്ങള് കാര്യക്ഷമമായി പരിഹരിക്കാനാവുമെന്ന് അദ്ധ്യക്ഷനായ ഡെപ്യൂട്ടി കളക്ടര് സുരേഷ് കുമാര് പറഞ്ഞു. അസിസ്റ്റന്റ് കളക്ടര് ഇഷ പ്രിയ, കൊച്ചി തഹസീല്ദാര് ജോസ് മാത്യു, തഹസീല്ദാര് (എല് ആര്) മുഹമ്മദ് സാബിന് തുടങ്ങിയവര് സംസാരിച്ചു.
