കോട്ടയം: ശബരിമല വിമാനത്താവളത്തിനായി ചെറുവളളി എസ്റ്റേറ്റ് വില കൊടുത്ത് ഏറ്റെടുക്കാനുളള സര്ക്കാര് നീക്കത്തെ നിയമപരമായും ജനകീയ സമരത്തിലൂടെയും എതിര്ക്കുമെന്ന് ബിജെപി ദേശീയ നിര്വാഹക സമിതി അംഗം വി.മുരളീധരന്. സ്വകാര്യ വ്യക്തിയുടെ ഭൂമിയല്ല ചെറുവള്ളി എസ്റ്റേറ്റ്. സര്ക്കാരിന്റെ മാത്രം ഭൂമിയാണിത്. ഈ ഭൂമിയില് വിമാനത്താവളം നിര്മ്മിക്കുന്നതിനുള്ള പ്രാരംഭ പ്രവര്ത്തനങ്ങള് തുടങ്ങുകയാണ് സര്ക്കാര് ചെയ്യേണ്ടതെന്ന് അദ്ദേഹം പത്രസമ്മേളനത്തില് പറഞ്ഞു.
ചെറുവള്ളി എസ്റ്റേറ്റ് 2015 മെയ് 28ന് തന്നെ സര്ക്കാര് ഏറ്റെടുത്തതാണ്. വിമാനത്താവളത്തിനായി ഭൂമി ഏറ്റെടുക്കുന്ന കാര്യം ഇപ്പോള് കൈവശം വച്ചിരിക്കുന്ന ഗോസ്പല് ഏഷ്യ ഒരു വര്ഷം മുമ്പ് തന്നെ അറിഞ്ഞതാണ്. ഭൂമി തിരിച്ച് പിടിക്കാനുള്ള സ്പെഷ്യല് ഓഫീസര് എം.ജി രാജമാണിക്യത്തിന്റെ നേതൃത്വത്തിലാണ് ചെറുവള്ളി എസ്റ്റേറ്റ് ഏറ്റെടുത്തത്. 18 ഉത്തരവുകളിലായി ഹാരിസണ് മലയാളം പ്ലാന്റേഷന്സ് കൈവശം വച്ചതും മറിച്ച് വിറ്റതുമായ 38, 171 ഏക്കര് ഭൂമിയാണ് അന്ന് ഏറ്റെടുത്തത്. ഇതില് ചെറുവള്ളി എസ്റ്റേറ്റിലെ 2264 ഏക്കറും വരുമെന്ന് മുരളീധരന് പറഞ്ഞു.
ചെറുവള്ളി എസ്റ്റേറ്റിന് സര്ക്കാരിന് വില കൊടുത്താല് ഇതു പോലെ അനധികൃതമായി കൈവശം വച്ചുരിക്കുന്ന അഞ്ച് ലക്ഷത്തലധികം ഏക്കര് തോട്ട ഭൂമി സര്ക്കാര് ഏറ്റെടുക്കുന്നത് തടയാം. കോടികളുടെ അഴിമതിക്കാണ് കളമൊരുങ്ങുന്നത്. തോട്ടം കേസില് കുത്തകളുമായി ഒത്തുതീര്പ്പിനുള്ള ശ്രമത്തിന്റെ ഭാഗമായാണ് പുതിയ നീക്കം. അതുകൊണ്ടാണ് തോട്ടം ഏറ്റെടുക്കാന് പ്രത്യേക നിയമ നിര്മ്മാണം വേണമെന്ന് സ്പെഷ്യല് ഓഫീസര് നിര്ദ്ദേശിച്ചിട്ടും സര്ക്കാര് അതിന് തയ്യാറാകാത്തത്.
സംസ്ഥാനത്തെ ക്രമസമാധാനം ഉറപ്പാക്കാന് കേന്ദ്ര സര്ക്കാര് ഭരണഘടനാപരമായ എല്ലാ മാര്ഗ്ഗങ്ങളും ഉപയോഗിക്കും. ഭരണഘടനാവിരുദ്ധമായ യാതൊരു നടപടിയും ഉണ്ടാകില്ല. എല്ലാ വിഭാഗം ജനങ്ങളുടെയും സമാധാനവും സുരക്ഷിതത്വവും ഉറപ്പാക്കും. സമാധാനം കൈവരിക്കുകയെന്ന ലക്ഷ്യത്തില് സര്വ്വകക്ഷയോഗം ചേരുന്നത് ഗുണപരമാണ്.
സര്ക്കാരും പോലീസും അക്രമികള്ക്കെതിരെ മുഖം നോക്കാതെ നടപടിയെടുത്താല് സമാധാനമുണ്ടാക്കാം. എന്നാല് യജമാനനോട് വലിയ ഭക്തി കാണിക്കുന്ന ഉദ്യോഗസ്ഥരും സിപിഎം ഫ്രാക്ഷന്റെ തലപ്പത്ത് പ്രവര്ത്തിക്കുന്നവരും ഇത് അട്ടിമറിക്കുകയാണ്. ഇവരെ മുഖ്യമന്ത്രി നിയന്ത്രിക്കണമെന്ന് അദ്ദേഹം ആവശ്യപ്പെട്ടു. ബിജെപി മദ്ധ്യമേഖല പ്രസിഡന്റ് അഡ്വ. എന്കെ നാരായണന് നമ്പൂതിരി, ജില്ലാ ജനറല് സെക്രട്ടറി ലിജിന്ലാല് എന്നിവര് പങ്കെടുത്തു.
