തളിപ്പറമ്പ്: വേറിട്ട വഴികളിലൂടെ സഞ്ചരിച്ച് കപാലിക്കുളങ്ങര സ്വാശ്രയസംഘം മാതൃക കാട്ടി. കൊട്ടിയൂര് ഉത്സവകാലത്ത് തളിപ്പറമ്പ് രാജരാജേശ്വര ക്ഷേത്ര പരിസരത്തുനിന്നും ഭക്തജനങ്ങളുടെ തീര്ത്ഥാടനയാത്ര സംഘടിപ്പിച്ചതിലൂടെ സ്വരൂപിച്ച പണം ഇരുവൃക്കകളും തകര്ന്ന് ഡയാലിസിസിലൂടെ ജീവന് നിലനിര്ത്തുന്ന ചെറുപ്പക്കാരന് നല്കിയാണ് മാതൃക കാട്ടിയത്. സ്വാശ്രയ സംഘത്തിന്റെ പേരില് ടൂറിസ്റ്റ് ബസ്സുകളും മറ്റും സംഘടിപ്പിച്ചാണ് ഭക്തജനങ്ങളെ കൊട്ടിയൂരില് കൊണ്ടുപോയിരുന്നത്. ഈ ഇനത്തില് ബാക്കിവന്ന പണമാണ് കപാലിക്കുളങ്ങരയിലെ യുവാവിന് നല്കിയത്. സ്വാശ്രയസംഘം പ്രസിഡണ്ട് കെ.ഗോപാലകൃഷ്ണന്, സെക്രട്ടറി വി.അഭിലാഷ് എന്നിവര് വീട്ടിലെത്തിയാണ് തുക നല്കിയത്. ഇത്തരത്തിലുള്ള ഒട്ടേറെ പ്രവര്ത്തനങ്ങള് ഇതിനുമുമ്പും സംഘം ചെയ്തിട്ടുണ്ട്.
പുഴക്കുളങ്ങരയിലെ അംഗന്വാടിക്ക് കുടിവെള്ള സംഭരണിയും പൈപ്പ്ലൈനും നിര്മ്മിച്ചുനല്കുകയും, കഴിഞ്ഞ വിഷുദിനത്തില് നാട്ടിലെ നിര്ദ്ധനരായവര്ക്ക് വിഷുക്കോടിയും ഭക്ഷ്യവസ്തുക്കളും നല്കുകയും ചെയ്തിരുന്നു. ഈ വര്ഷംനാട്ടിലെ എല്ലാ ജാതിമതത്തില്പ്പെട്ടവര്ക്കും ഓണക്കോടി നല്കും. അതോടൊപ്പം അംഗന്വാടിയിലെ മുഴുവന് കുട്ടികള്ക്കും ഓണക്കോടി നല്കും. അന്നേദിവസം തന്നെ കപാലിക്കുളങ്ങര സ്വദേശിയായ കോഴിക്കോട് ജില്ലാസെഷന്സ് ജഡ്ജി കെ.സോമനെ ആദരിക്കും.
