കണ്ണൂര്: നവകേരളം കര്മ്മ പദ്ധതിയുടെ ഭാഗമായി സംസ്ഥാനത്തെ മുഴുവന് ഭവന രഹിതര്ക്കും വീട് വെച്ച് നല്കുന്നതിനുള്ള ലൈഫ് മിഷന്റെ ഗുണഭോക്താക്കളുടെ കരട് പട്ടിക പ്രസിദ്ധീകരിച്ചു. പട്ടിക ബന്ധപ്പെട്ട പഞ്ചായത്തുകളിലും നഗരസഭകളിലും പരിശോധനക്ക് ലഭിക്കും. കുടുംബശ്രീ മുഖേന നടത്തിയ സര്വ്വെയിലൂടെയാണ് ഗുണഭോക്താക്കളുടെ പട്ടിക തയ്യാറാക്കിയത്. കരട് പട്ടിക സംബന്ധിച്ച പരാതികള് ആഗസ്ത് 10 വരെ അതത് തദ്ദേശസ്ഥാപന സെക്രട്ടറിമാര്ക്ക് നല്കാം. വ്യക്തികള്ക്കും സംഘടനകള്ക്കും അപ്പീല് നല്കാന് അവസരമുണ്ട്. അര്ഹരായവരെ ഉള്പ്പെടുത്താനും അനര്ഹരെ ഒഴിവാക്കാനും തെറ്റുകള് തിരുത്താനും അപ്പീല് നല്കാവുന്നതാണ്.
സ്വന്തമായി ഭൂമിയും വീടും ഇല്ലാത്തവര്, സ്വന്തമായി ഭൂമിയുണ്ടെങ്കിലും വീട് ഇല്ലാത്തവര് എന്നീ രണ്ട് വിഭാഗങ്ങളിലായാണ് പട്ടിക തയ്യാറാക്കിയിട്ടുള്ളത്. ഒന്നാം വിഭാഗത്തില് സ്വന്തമായോ കുടുംബാംഗങ്ങളുടെ പേരിലോ ഭൂമി ഇല്ലാത്തവര്, റേഷന് കാര്ഡ് ഉള്ള കുടുംബം, വാര്ഷിക വരുമാനം മൂന്ന് ലക്ഷത്തില് താഴെയുള്ളവര്, പരമ്പരാഗതമായി കുടുംബസ്വത്ത് കൈമാറി കിട്ടാന് സാധ്യത ഇല്ലാത്തവര് എന്നിവയാണ് അര്ഹതാ മാനദണ്ഡം.
രണ്ടാം വിഭാഗത്തില് നഗരങ്ങളില് അഞ്ച് സെന്റിനും ഗ്രാമങ്ങളില് 25 സെന്റിനും താഴെ സ്വന്തമായി ഭൂമിയുള്ള റേഷന് കാര്ഡ് ഉള്ള കുടുംബത്തെയാണ് വീടിന് അര്ഹതയുള്ള ഭവന രഹിതരായി കണക്കാക്കുന്നത്. സ്വന്തമായോ കുടുംബാംഗങ്ങളുടെ പേരിലോ വീട് ഉണ്ടാവാന് പാടില്ല. പരമ്പരാഗതമായി വീട് കൈമാറികിട്ടാന് സാധ്യതയുള്ളവരും ആയിരിക്കരുത്. കുടുംബ വാര്ഷിക വരുമാനം മൂന്ന് ലക്ഷത്തില് താഴെയായിരിക്കണം.
രണ്ട് വിഭാഗങ്ങളിലും സര്ക്കാര്, അര്ധ സര്ക്കാര്, പൊതുമേഖലാ സ്ഥാപനങ്ങളിലെ ജീവനക്കാരും പെന്ഷന് കൈപ്പറ്റുന്ന കുടുംബങ്ങളും ആനുകൂല്യത്തിന് അര്ഹരല്ല. സ്വകാര്യ ആവശ്യത്തിന് നാല് ചക്ര വാഹനം ഉള്ളവര്ക്കും അര്ഹതയുണ്ടായിരിക്കുന്നതല്ല.
അര്ഹരായവര് പട്ടികയില് ഒഴിവാക്കപ്പെടാതിരിക്കാന് സന്നദ്ധ സംഘടനകള്ക്കോ സേവന സന്നദ്ധരായ വ്യക്തികള്ക്കോ അപ്പീലുകള് സമര്പ്പിക്കാവുന്നതാണ്. ഇങ്ങനെ അപ്പീല് സമര്പ്പിക്കുമ്പോള് അര്ഹത തെളിയിക്കേണ്ടത് അപ്പീല് നല്കുന്നവരുടെ ഉത്തരവാദിത്തമായിരിക്കും. ബന്ധപ്പെട്ട് വാര്ഡ് അംഗം, കൗണ്സിലര് എന്നിവര്ക്കും ഇത്തരം പരാതി സെക്രട്ടറിയുടെ ശ്രദ്ധയില്പ്പെടുത്താവുന്നതാണ്. അര്ഹരായവരുടെ പട്ടിക പരിശോധിച്ച് അംഗീകാരം നല്കുന്നതിനായി തദ്ദേശസ്വയംഭരണ സ്ഥാപനത്തില് സ്ക്രൂട്ടിനി ആന്റ് അപ്പീല് കമ്മിറ്റിക്ക് രൂപം നല്കണമെന്നും സര്ക്കാര് നിര്ദേശിച്ചിട്ടുണ്ട്.
