ഇടുക്കി: പള്ളിവാസല് പൈപ്പ് ലൈനിന് സമീപം പ്രവര്ത്തിക്കുന്ന പ്ലം ജൂഡി റിസോര്ട്ട് നിര്മ്മിച്ചത് ഹൈക്കോടതി വിധി ലംഘിച്ചാണെന്നതിന് കൂടുതല് തെളിവുകള്. 2014ല് അന്നത്തെ ദേവികുളം തഹസില്ദാര് ഹൈക്കോടതിയുടെ 2010ലെ വിധി ലംഘിച്ചാണ് നിജസ്ഥിതി സര്ട്ടിഫിക്കറ്റ് നല്കിയത്. പഞ്ചായത്ത് സെക്രട്ടറി നല്കിയ നിജസ്ഥിതി സര്ട്ടിഫിക്കറ്റ് പരിശോധിച്ച് തഹസില്ദാര് അപേക്ഷകന്റെ ഭൂമിയുടെ നിജസ്ഥിതി സര്ട്ടിഫിക്കറ്റ് നല്കുകയായിരുന്നു.
കോടതി വിധികളും ജില്ലാ കളക്ടറുടെ ഉത്തരവും പരിശോധിച്ച് പ്രസ്തുത വസ്തുവില് റിസോര്ട്ട് നിര്മ്മിക്കുന്നതിന് ആക്ഷേപമില്ല എന്ന സര്ട്ടിഫിക്കറ്റായിരുന്നു തഹസില്ദാര് നല്കേണ്ടിയിരുന്നത്. ഈ നിജസ്ഥിതി സര്ട്ടിഫിക്കറ്റ് പ്രകാരം പഞ്ചായത്ത് സെക്രട്ടറി പ്ലം ജൂഡി റിസോര്ട്ടിന് പെര്മിറ്റ് നല്കി. ഹൈക്കോടതി വിധി ലംഘിച്ച് പൈപ്പ് ലൈനിന് സമീപം കൂറ്റന് കെട്ടിടം പണിയാന് റവന്യൂ-പഞ്ചായത്ത് ഉദ്യോഗസ്ഥര് കൂട്ട് നില്ക്കുകയായിരുന്നു.
പാറ വീഴ്ചയെത്തുടര്ന്ന് കളക്ടര് പൂട്ടിയ റിസോര്ട്ടിന് 2017 മാര്ച്ച് 31ന് ഡി ആന്ഡ് ഒ ലൈസന്സ് കാലാവധി അവസാനിച്ചിരുന്നു. ഡി ആന്ഡ് ഒ ലൈസന്സ് പുതുക്കി നല്കാന് പള്ളിവാസല് പഞ്ചായത്ത് സെക്രട്ടറി വിമുഖത പ്രകടിപ്പിച്ച അവസരത്തിലാണ് ഭരണകക്ഷിക്കാരുടെ സമ്മര്ദ്ദത്തെത്തുടര്ന്ന് 2017 ജൂണ് 24ന് റിസോര്ട്ട് തുറക്കാന് കളക്ടര് അനുമതി നല്കിയത്. നിയമവിരുദ്ധമായി നിര്മ്മിച്ച പ്ലം ജൂഡി റിസോര്ട്ടിന് പ്രവര്ത്തിക്കാന് അനുമതി നല്കിയതിനെതിരെ വിജിലന്സിനും റവന്യൂ വകുപ്പ് പ്രിന്സിപ്പല് സെക്രട്ടറിക്കും പരാതി എത്തിയിട്ടുണ്ട്. ഇതേക്കുറിച്ച് ഇതുവരെ അന്വേഷണം നടന്നിട്ടില്ല.
