ഇരിട്ടി: മലയോരത്ത് പെയ്യുന്ന കനത്ത മഴയില് കച്ചേരിക്കടവ് ബാരാപ്പോള് റോഡിന്റെ അരിക് ഭിത്തി തകര്ന്ന് റോഡ് അപകടാവസ്ഥയിലായി. കച്ചേരിക്കടവ് പള്ളിക്ക് സമീപം വെള്ളം കുത്തിയൊഴുകുന്ന തോടിനോട് ചേര്ന്ന അകരിങ്കല് ഭിത്തിയും റോഡിന്റെ ഒരു ഭാഗവും തോട്ടിലേക്ക് തകര്ന്നു വീഴുകയായിരുന്നു. ഇതോടെ ഇത് വഴിയുള്ള വാഹന ഗതാഗതവും അപകടത്തിലായി. മഴ തുടരുകയാണെങ്കില് ഇനിയും ഈ ഭാഗം ഇടിഞ്ഞു വീഴാന് സാദ്ധ്യത ഏറെയാണ്.
ബാരാപ്പോള് പദ്ധതിയുടെ ഭാഗമായി റോഡിന്റെ മറുവശത്ത് ആഴത്തില് ചാലുകീറി ഭൂഗര്ഭ കേബിളുകള് സ്ഥാപിച്ചിരുന്നു. റോഡിനു ഓവുചാല് നിര്മ്മിക്കാത്തതു മൂലം ഈ ഭാഗങ്ങളില് വെള്ളം കെട്ടി നില്ക്കുന്നത് പതിവാണ്. ഇപ്പോള് റോഡ് ഇടിഞ്ഞുവീണ ഭാഗത്തിന് എതിര്വശത്തുള്ള സ്വകാര്യ വ്യക്തിയുടെ സ്ഥലത്തിന്റെ മതിലും ഇടിഞ്ഞു വീണിട്ടുണ്ട്. ഈ മതില് പുനര്നിര്മ്മിക്കാനായി ചെങ്കല് ഇറക്കിവെച്ച ഭാഗത്തെ റോഡും മതിലുമാണ് കഴിഞ്ഞദിവസത്തെ മഴയില് ഇടിഞ്ഞു വീണത്. ഇവിടെ ഇറക്കിവെച്ച ചെങ്കല്ലുകളും മതിലിനൊപ്പം തോട്ടിലേക്കു പതിച്ചു. അതേസമയം ഇതുവഴി കടന്നുപോകുന്ന ഭാരവാഹനങ്ങളോ ബസ്സോ ആയിരുന്നെങ്കില് അതൊരു വന് അപകടമാകുമായിരുന്നു എന്ന് ജനങ്ങള് പറയുന്നു
