തലശ്ശേരി: ബോംബ് നിര്മാണത്തിനിടയിലുണ്ടായ സ്ഫോടനത്തില് സിപിഎമ്മുകാരന്റെ കൈപ്പത്തി തകര്ന്നു. ബോംബ് നിര്മാണത്തിലേര്പ്പെട്ട മറ്റ് ഏതാനും സിപിഎമ്മുകാര്ക്ക് ഗുരുതരമായി പരിക്കേല്ക്കുകയും ചെയ്തിട്ടുണ്ട്. പാനുണ്ട പൊട്ടന്പാറക്കടുത്ത് രാവുണ്ണി നഗറിലാണ് സംഭവം. കൈപ്പത്തി ചിതറിയ നിലയില് തലശ്ശേരി സഹകരണ ആശുപത്രിയില് പ്രവേശിപ്പിച്ച സിപിഎമ്മുകാരന് ഷിജിനെ പ്രാഥമിക ചികിത്സക്ക് ശേഷം കോഴിക്കോട് സ്വകാര്യ ആശുപത്രിയിലേക്ക് മാറ്റി. പരിക്കേറ്റ മറ്റുള്ളവരെ അജ്ഞാതകേന്ദ്രത്തിലേക്ക് മാറ്റിയിരിക്കുകയാണ്.
സിപിഎം ശക്തികേന്ദ്രമായ പൊട്ടന്പാറയില് ഇതിന് മുമ്പും ബോംബ് നിര്മാണത്തിനിടെയുണ്ടായ സ്ഫോടനത്തില് സിപിഎമ്മുകാര്ക്ക് പരിക്കേറ്റിരുന്നു. മുമ്പുണ്ടായ സ്ഫോടനത്തില് ജീവന് എന്ന 19 കാരനായ സിപിഎം പ്രവര്ത്തകന് രണ്ട് കൈകളും നഷ്ടപ്പെട്ടിരുന്നു.
ഇന്നലെ സ്ഫോടനം നടന്ന രാവുണ്ണി നഗറില് കൂത്തുപറമ്പ് സിഐ യു.പ്രേമന്റെ നേതൃത്വത്തിലുള്ള പോലീസ് സംഘം പരിശോധന നടത്തി. എന്നാല് സ്ഫോടനം നടന്ന സ്ഥലത്തേക്ക് മറ്റുള്ളവര് പ്രവേശിക്കുന്നത് സിപിഎം സംഘം തടഞ്ഞതായും ആരോപണമുണ്ട്. അടുത്ത കാലത്തായി അനിഷ്ടസംഭവങ്ങളൊന്നും റിപ്പോര്ട്ട് ചെയ്യപ്പെട്ടിട്ടില്ലാത്ത പ്രദേശത്ത് നടന്ന സ്ഫോടനം നാട്ടുകാരെ പരിഭ്രാന്തിയിലാക്കിയിരിക്കുകയാണ്. ഈ സംഭവത്തിന് ശേഷം ജനശ്രദ്ധ തിരിക്കുന്നതിനാണ് പരിസര പ്രദേശമായ പൂള ബസാറിലെ തെങ്ങുകയറ്റത്തൊഴിലാളിയായ പുരുഷോത്തമന്റെ വീടിന് നേരെ അക്രമം നടത്തിയതെന്നാണ് സൂചന. രണ്ട് സംഭലങ്ങളിലും കതിരൂര് പോലീസ് അന്വേഷണം നടത്തിവരികയാണ്.
