ന്യൂദല്ഹി: പിതാവിന്റെ ലൈംഗിക അതിക്രമത്തിന് ദൃക്സാക്ഷിയാകാന് വിധിക്കപ്പെട്ടത് മകള് മധ്യദല്ഹിയിലെ കമല മാര്ക്കറ്റിന് സമീപം ഒരു പാര്ക്കിലാണ് സംഭവം. പിതാവ് എട്ടു വയസ്സുള്ള കുട്ടിയെ പീഡിപ്പിക്കുന്നത് സംഭവസ്ഥലത്തിന് ഏതാനും മീറ്ററുകള് അകലെ കളിച്ചുകൊണ്ടിരുന്ന മകള് കാണുകയായിരുന്നുവെന്ന് പോലീസ് പറയുന്നു.
സംഭവ ദിവസം പ്രതി മകള്ക്കൊപ്പം പാര്ക്കിലെത്തുകയും കൂട്ടുകാര്ക്കൊപ്പം മകള് കളിക്കാന് പോയ സമയത്ത് എട്ടുവയസുള്ള ഒരു പെണ്കുട്ടിയെ ലൈംഗികമായി പീഡിപ്പിക്കുകയായിരുന്നു. പെണ്കുട്ടി ബഹളം വച്ചതോടെ ഇയാള് കൊല്ലുമെന്ന് പറഞ്ഞു ഭീഷണിപ്പെടുത്തി. പെണ്കുട്ടിയുടെ കരച്ചില് കേട്ട് എത്തിയ ഇയാളുടെ മകള് സംഭവത്തിന് ദൃക്സാക്ഷിയാണെന്ന് പോലീസ് പറയുന്നു.
വീട്ടിലെത്തിയ കുട്ടി മാതാപിതാക്കളോട് വിവരം പറയുകയും അവര് പോലീസിനെ സമീപിക്കുകയുമായിരുന്നു. പോലീസ് അറസ്റ്റ് ചെയ്ത ഇയാള്ക്കെതിരെ ലൈംഗികാതിക്രമത്തിനും പോക്സോ വകുപ്പ് പ്രകാരവും കേസെടുത്തിട്ടുണ്ട്.
പീഡനത്തിന് ഇരയാക്കപ്പെട്ട പെണ്കുട്ടിയെ ശരീരപരിശോധനയ്ക്ക് വിധേയയാക്കി. പിതാവ് കുറ്റം ചെയ്യുന്നത് കണ്ടു നിന്നതിനാല് പെണ്കുട്ടിയെയും കൗണ്സിലിങ്ങിന് വിധേയയാക്കി. എന്നാല് പെണ്കുട്ടി പിതാവിനെതിരായി ഇതുവരെ മൊഴി നല്കിയിട്ടില്ല. കൗണ്സിലിങ്ങിലൂടെ കുട്ടി പറയുമോ എന്ന് പോലീസ് കാക്കുകയാണ്. കോടതിയുടെ നിര്ദേശ പ്രകാരം നടപടികള് പൂര്ത്തീകരിക്കുകയാണെന്നും ഇരുപെണ്കുട്ടികളെയും സംഭവത്തിന്റെ ആഘാതത്തില് നിന്ന് കരകയറ്റുകയാണ് ലക്ഷ്യമെന്നും പോലീസ് പറഞ്ഞു.
