കൊച്ചി: മന്ത്രി സുധാകരന്റെ വര്ണവെറി നിറഞ്ഞ പ്രസ്താവന ലോക ബാങ്കില് നിന്ന് കേരളത്തിനുള്ള സഹായം ഇല്ലാതാക്കാന് കാരണമായതായി ബിജെപി സംസ്ഥാന പ്രസിഡന്റ് കുമ്മനം രാജശേഖരന് പത്രസമ്മേളനത്തില് പറഞ്ഞു.
കേരളത്തിന്റെ വികസനത്തിന് ലോകബാങ്ക് സഹായം കൂടിയെ തീരൂ എന്നിരിക്കെ ഇത്തരം പ്രസ്താവന നടത്തിയ മന്ത്രിയുടെ പേരില് മുഖ്യമന്ത്രി നടപടിയെടുക്കണം. കേരളത്തിന്റെ റോഡുവികസനത്തിനും തദ്ദേശ സ്വയംഭരണ സ്ഥാപനങ്ങളുടെ പദ്ധതി നടത്തിപ്പിനും ജലനിധിയ്ക്കും ലോകബാങ്ക് സഹായം നല്കി വരുന്നതിനിടെയാണ് ഒരു ജനവിഭാഗത്തെ വേദനിപ്പിക്കുന്ന തരത്തില് സുധാകരന്റെ പ്രസ്താവന ഉണ്ടായത്.
സംസ്ഥാന സര്ക്കാര് സഹായം നല്കുന്നവര്ക്ക് എതിരെ നിരന്തരമായി ദുഷ്ടലാക്കോടെ പ്രസ്താവന ഇറക്കി വരുകയാണ്. തൊഴിലുറപ്പ് പദ്ധതിയ്ക്ക് ആവശ്യമായ തുക കേന്ദ്രസര്ക്കാര് നല്കുകയുണ്ടായി. ഇതിന്റെ കണക്കുകള് നല്കുന്നതിന് സംസ്ഥാന സര്ക്കാരിന്റെ വീഴ്ചയാണ് തൊഴിലുറപ്പ് പദ്ധതിയ്ക്ക് പണം ലഭിക്കാതിരിക്കാന് കാരണമായത്.
തൊഴിലുറപ്പ് പദ്ധതിയില് പണിയെടുത്ത തൊഴിലാളികളുടെ ദുരിതം മനസിലാക്കി കേന്ദ്രസര്ക്കാര് 750 കോടി രൂപ ഇപ്പോള് നല്കിയിട്ടുണ്ട്. കേന്ദ്രപദ്ധതികള് പലതും പേരുമാറ്റ് സ്വന്തം പദ്ധതികളാക്കി നടപ്പിലാക്കുകയാണ് സംസ്ഥാന സര്ക്കാര് ചെയ്യുന്നത്. ഈ പ്രവണത ഇല്ലാതാക്കിയെ മതിയാകൂ.
കേരളത്തിലെ ബിജെപി നേതൃത്വത്തിന് കേന്ദ്ര സര്ക്കാരിനോട് അഭ്യര്ത്ഥിക്കാനുള്ളത് മന്ത്രിയുടെ പ്രസ്താവന എന്തു തന്നെ ആയിരുന്നാലും കേരളത്തിന്റെ വികസനത്തിന് ആവശ്യമായ തുക ലോകബാങ്കില് നിന്ന് നേടിയെടുക്കുന്നതിന് സഹായിക്കണമെന്നാണ് കുമ്മനം പറഞ്ഞത്.
