മട്ടാഞ്ചേരി: കൊച്ചി പുറംകടലില് വിദേശ കപ്പലിടിച്ച് മത്സ്യബന്ധന ബോട്ട് തകരുകയും രണ്ട് മത്സ്യത്തൊഴിലാളികള് മരിക്കുകയും ഒരാളെ കാണാതാകുകയും ചെയ്ത സംഭവത്തില് അറസ്റ്റിലായ കപ്പല് ക്യാപ്റ്റനടക്കമുള്ള മൂന്ന് പ്രതികളെയും മൂന്ന് ദിവസത്തേക്ക് പോലീസ് കസ്റ്റഡിയില് വിട്ടു. കൂടുതല് ചോദ്യം ചെയ്യുന്നതിനായി പ്രതികളെ കസ്റ്റഡിയില് വേണമെന്ന കോസ്റ്റല് പോലീസിന്റെ ആവശ്യപ്രകാരമാണ് കോടതി പ്രതികളെ കസ്റ്റഡിയില് വിട്ട് നല്കിയത്.
കസ്റ്റഡിയില് വാങ്ങിയ പ്രതികളെ കോസ്റ്റല് എസ്ഐ ടി.എം. വര്ഗീസിന്റെ നേതൃത്വത്തില് ഫോര്ട്ട്കൊച്ചി കോസ്റ്റല് പോലീസ് സ്റ്റേഷനില് വിശദമായി ചോദ്യം ചെയ്യുകയാണ്.
സംഭവത്തില് എംഎംഡി സമര്പ്പിച്ച പ്രാഥമിക റിപ്പോര്ട്ടിന്റെ അടിസ്ഥാനത്തിലാണ് കോസ്റ്റല് പോലീസ് പ്രതികളെ അറസ്റ്റ് ചെയ്തത്. ചോദ്യം ചെയ്യലിന് ഇവരെ നാളെ വീണ്ടും കോടതിയില് ഹാജരാക്കും.
