കണ്ണൂര്: ഇന്നലെ തൊഴില് മന്ത്രിയുമായി ഇന്ഡ്യന് നഴ്സസ് അസോസിയേഷന് ഭാരവാഹികള് നടത്തിയ ചര്ച്ച പരാജയപ്പെട്ട സാഹചര്യത്തില് കണ്ണൂരിലെ ആശുപത്രികളില് നടക്കുന്ന നഴ്സുമാരുടെ സമരം തുടരുമെന്ന് അസോസിയേഷന് ഭാരവാഹികള് അറിയിച്ചു. അസോസിയേഷന്റെ ആവശ്യങ്ങള് പെട്ടെന്ന് അംഗീകരിക്കാന് വിഷമമുണ്ടെന്ന മന്ത്രിയുടെ അഭിപ്രായത്തെ തുടര്ന്നാണ് ചര്ച്ച പരാജയപ്പെട്ടത്.
അതേ സമയം 10-ാം തീയ്യതിവരെ പ്രശ്നം പരിഹരിക്കാന് സാവകാശം വേണമെന്ന മന്ത്രിയുടെ അഭ്യര്ത്ഥനമാനിച്ച് നാളെ മുതല് കണ്ണൂരിലെ കൂടുതല് ആശുപത്രികളില് ആരംഭിക്കാനുളള സമരവും കാസര്കോട് ജില്ലയിലെ നഴ്സുമാര് ആരംഭിക്കാനിരുന്ന സമരവും താല്ക്കാലികമായി ഉപേക്ഷിച്ചതായി ഇവര് പറഞ്ഞു.
ജില്ലയിലെ 5 പ്രമുഖ ആശുപത്രികളില് നഴ്സുമാര് നടത്തിവരുന്ന സമരം ആശുപത്രികളുടെ പ്രവര്ത്തനത്തെ താളംതെറ്റിച്ചിരിക്കുകയാണ്. നഴ്സിംഗ് വിദ്യാര്ത്ഥികളേയും മറ്റും മണിക്കൂറുകളോളം ഡ്യൂട്ടിക്ക് നിയോഗിച്ചാണ് ആശുപത്രികളുടെ പ്രവര്ത്തനം മുന്നോട്ട് പോകുന്നത്. സമരം ചെയ്ത നഴ്സുമാര് അതത് ആശുപത്രികള്ക്ക് മുന്നില് ധര്ണ്ണാ സമരം നടത്തി വരികയാണ്.
