കണ്ണൂര്: സര്വ്വശിക്ഷാ അഭിയാന് 2017-18 വര്ഷം നടപ്പാക്കാന് ഉദ്ദേശിക്കുന്ന വിവിധ പദ്ധതികള്ക്ക് പി.കെ.ശ്രീമതി എംപി അധ്യക്ഷതയില് നടന്ന ജില്ലാ മോണിറ്ററിംഗ് കമ്മിറ്റി അംഗീകാരം നല്കി. 30 കോടി 97 ലക്ഷം രൂപയുടെ പദ്ധതികളാണ് ഈ വര്ഷം നടപ്പാക്കുക. കഴിഞ്ഞ വര്ഷത്തേക്കാള് 3 കോടി രൂപ കൂടുതലാണിത്.
വിവിധ സ്കൂളുകള്ക്ക് ക്ലാസ്റൂമുകള്, ടോയ്ലറ്റുകള്, പ്രധാന അറ്റകുറ്റപ്പണികള് എന്നിവക്കുവേണ്ടി 1 കോടി 66 ലക്ഷം രൂപ നീക്കിവെച്ചു.
ആദിവാസി കോളനികളിലുള്ള കുട്ടികള്ക്ക് പഠനപിന്തുണ നല്കുന്നതിനുള്ള 8 കേന്ദ്രങ്ങള് ഇരട്ടിയായി വര്ദ്ധിപ്പിക്കും. യുപി അധ്യാപകര്ക്ക് ഐടി അധിഷ്ഠിത പഠനത്തില് പ്രത്യേക പരിശീലനം ഈ വര്ഷം പുതുതായി നല്കും. പൊതുവിദ്യാഭ്യാസ സംരക്ഷണയജ്ഞം മുന്നോട്ടു കൊണ്ടുപോകാന് പഞ്ചായത്തുതല സെമിനാറുകളും ആസൂത്രണം ചെയ്തിട്ടുണ്ട്.
വിദ്യാലയങ്ങളില് നിന്നും കൊഴിഞ്ഞുപോയവരോ ഇതുവരെയും പ്രവേശനം നേടാത്തവരോ ആയ കുട്ടികളെ കണ്ടെത്തി തുടര്പഠനം ഉറപ്പുവരുത്താന് വിപുലമായ പരിപാടികള് ആവിഷ്ക്കരിക്കും. സ്കൂള് മാനേജ്മെന്റ് കമ്മിറ്റിയും കോര്ണര് പിടിഎയും സജീവമാക്കാന് നടപടി തുടങ്ങി.
എല്ലാവിധ ഗ്രാന്റുകളുടെയും വിതരണം ജൂലായ് 10 നകം പൂര്ത്തിയാക്കും. വിദൂര സ്ഥലങ്ങളില് നിന്നും വരുന്ന കുട്ടികള്ക്ക് ഈ വര്ഷം പുതുതായി യാത്രാ അലവന്സ് അനുവദിക്കുന്നതായിരിക്കും. അധ്യാപകപഠനക്കൂട്ടം, വിദ്യാലയകൂടിച്ചേരല് പരിപാടി, ശാസ്ത്രപഠനയാത്രകള് എന്നിവയ്ക്കും ഈ വര്ഷം ധനസഹായം നല്കും. ദിശ മോണിറ്ററിംഗ് കമ്മിറ്റിയില് പി.കരുണാകരന് എം.പി, സി.കൃഷ്ണന് എംഎല്എ, ടി.വി.രാജേഷ് എം.എല്എ, കലക്ടര് മിര് മുഹമ്മദ് അലി, മേയര് ഇ.പി.ലത തുടങ്ങിയവരും പങ്കെടുത്തു.
