ഗാന്ധിനഗര്: മെഡിക്കല് കോളേജില് കിടത്തി ചികിത്സയിലുള്ള രോഗികളെ സന്ദര്ശിക്കുന്നതിനുള്ള സമയക്രമത്തില് മാറ്റംവരുത്തി. എല്ലാദിവസവും ഉച്ചയ്ക്ക് ശേഷം 1.30മുതല് 4.30വരെ പാസ് ഉപയോഗിച്ചും 4.30മുതല് 7വരെ പാസില്ലാതെയും ഇനി വാര്ഡുകളില് പ്രവേശിക്കാം. അല്ലാത്തസമയത്ത് രോഗിയുടെ കൂടെ ഒരാള്ക്ക് മാത്രമേ പരിചരണത്തിനായി പ്രവേശനമുള്ളൂ.
രോഗിക്ക് കൂടുതല് ആളുകളുടെ പരിചരണം ആവശ്യമെങ്കില് യൂണിറ്റ് ചീഫിന്റെ അനുമതി വാങ്ങണം. കൂട്ടിരിപ്പുകാര് പുറത്ത് പോകുമ്പോള് ഗേറ്റിലുള്ള സുരക്ഷാ ഉദ്യോസ്ഥന്വശം പാസ് നല്കേണ്ടതും തിരികെ വരുമ്പോള് എല്പ്പിച്ച പാസ് വാങ്ങേണ്ടതുമാണ്. ഭക്ഷണപാസ് രാവിലെ 6മുതല് 7.30വരെയും ഉച്ചയ്ക്ക് 12മുതല് 1വരെയും വൈകിട്ട് 6മുതല് 7വരെയും മാത്രമേ ഉപയോഗിക്കാന് പാടുള്ളൂ. രോഗിയെ ഡിസ്ചാര്ജ്ജ് ചെയ്യമ്പോള് രണ്ടുപാസുകളും ഡ്യൂട്ടി നഴ്സിനെ എല്പ്പിച്ച് ഡിസ്ചാര്ജ്ജ് കാര്ഡ് വാങ്ങണം.
സെക്യൂരിറ്റി ജീവനക്കാരന് അതാത് ദിവസത്തെ ഡിസ്ചാര്ജ്ജ് ചെയ്യുന്നവരുടെ പാസ് ഡ്യൂട്ടി നഴ്സിന്റെ ഒപ്പുബുക്കില് വിവരം രേഖപ്പെടുത്തേണ്ടതുമാണ്.
സന്ദര്ശനസമയത്തൊഴികെ ജീവനക്കാര്ക്ക് വാര്ഡില് പ്രവേശിക്കണമെങ്കില് 4-ാം വാര്ഡിലെ ഗേറ്റുവഴി കടന്നു വരാവുന്നതും ഇവിടെ സൂക്ഷിച്ചിരിക്കുന്ന രജിസ്റ്ററില് ജീവനക്കാരനെ സംബന്ധിച്ച വിവരങ്ങളും സന്ദര്ശനസമയവും തീയതിയും രേഖപ്പെടുത്തുകയും ചെയ്യണം. ജീവനക്കാരന്റെകൂടെ രണ്ടുപേരെ മാത്രമേ കടത്തിവിടുകയുള്ളൂ. തിരിച്ചറിയല് കാര്ഡും നിര്ബന്ധമാണ്.
ആശുപത്രി വാര്ഡുകളില് നടക്കുന്ന അനിഷ്ട സംഭവങ്ങള്ക്ക് വിരാമമിടാന് ഉദ്ദേശിച്ചിട്ടുള്ള ഈ നിര്ദ്ദേശങ്ങള് പൊതുജനങ്ങളും ജീവനക്കാരും കര്ശനമായി പാലിക്കണമെന്ന് ആശുപത്രി സൂപ്രണ്ട് ഡോ.ടി.കെ.ജയകുമാര് അറിയിച്ചു.
