കൊട്ടിയൂര്: തൃക്കലശാട്ടത്തോടെ കൊട്ടിയൂര് വൈശാഖ മഹോത്സവം ഇന്ന് സമാപിക്കും. ഇന്ന് രാവിലെ വാകചാര്ത്തോടെ ചടങ്ങുകള് ആരംഭിക്കും. തുടര്ന്ന് തേങ്ങാമുറികളിലേക്ക് നാളം പകര്ന്ന ശേഷം വിളക്കുകള് കെടുത്തും.ഇതോടൊപ്പം അക്കരെ സന്നിധാനത്തെ എല്ലാ വിളക്കുകളും അണയ്ക്കും.
നമ്പീശന്, വാരിയര് എന്നിവരുടെ നേതൃത്വത്തില് ശ്രീകോവിലിന്റെ നാലു തൂണുകള് കടപുഴക്കിയെടുത്ത് തിരുവഞ്ചിറയില് നിക്ഷേപിക്കും. ഇതോടെ മണിത്തറ തൃക്കലശാട്ടിന് ഒരുങ്ങും. കലശമണ്ഡപത്തില് പൂജിച്ച് വെച്ച കളഭകുംഭങ്ങള് വാദ്യഘോഷങ്ങളോടെ മുഖമണ്ഡപത്തിലേക്ക് എഴുന്നള്ളിക്കും. തുടര്ന്ന് പ്രധാന തന്ത്രിമാരുടെ കാര്മികത്വത്തില് സ്വയംഭൂവില് ആടും. മുഴുവന് ബ്രാഹ്മണരും ചേര്ന്ന് സമൂഹ പുഷ്പാഞ്ജലിയും പ്രധാന തന്ത്രിയുടെ പൂര്ണ പുഷ്പാഞ്ജലിയും നടക്കും. പുഷ്പാഞ്ജലി കഴിഞ്ഞാല് തീര്ത്ഥവും പ്രസാദവും നല്കുന്നതോടൊപ്പം ആടിയ കളഭവും നല്കും. ഒരു ചെമ്പ് നിവേദ്യച്ചോറും കടുംപായസവും തിടപ്പള്ളിയില് ഇരുന്ന് കുടപതികള് കഴിക്കും.
മുളക്, ഉപ്പ് എന്നിവ മാത്രം ചേര്ത്ത് കഴിക്കുന്ന തണ്ടുമ്മല് ഊണ് എന്ന ചടങ്ങാണ് ഇത്. കൂത്തരങ്ങില് വെച്ച് ഭണ്ഡാരം തിരിച്ചെഴുന്നള്ളത്തിനുള്ള ഏറ്റുവാങ്ങല് നടത്തും. തുടര്ന്ന് അമ്മാറക്കല് തറയില് തൃച്ചന്ദനപ്പൊടി അഭിഷേകം നടത്തും. അതിനുശേഷം ആചാര്യന്മാരില് ഒരാള് യാത്രാബലി നടത്തും. യാത്രാബലിക്ക് മുന്പ് തന്ത്രിയും പരികര്മിയും ഓച്ചറും പന്തക്കിടാങ്ങളും അല്ലാതെ ബാക്കിയെല്ലാവരും അക്കരെ സന്നിധാനത്തില് നിന്ന് പുറത്ത് കടക്കും. ഭണ്ഡാരങ്ങളും വാളുകളും ആദ്യം ഇക്കരെയെക്ക് കടക്കും. തുടര്ന്ന് മണത്തണ കരിമ്പന ഗോപുരത്തിലേക്ക് എഴുന്നള്ളിക്കും. അത്തം നാളായ ഇന്നലെ വാളാട്ടം, കുടിപതികളുടെ തേങ്ങയേറ്, പായസ നിവേദ്യം, കൂത്ത് സമര്പ്പണം എന്നിവ നടന്നു. അത്തം നാളില് പന്തീരടിക്ക് അവസാനത്തെ ശീവേലിയും നടന്നു. ശീവേലി സമയത്ത് ചപ്പാരം ക്ഷേത്രത്തിലെ മൂന്ന് വാളുകളും എഴുന്നള്ളിച്ച് ഏഴില്ലക്കാരായ വാളശ്ശന്മാര് വാളാട്ടം നടത്തി.തിടമ്പുകള് വഹിക്കുന്ന ബ്രാഹ്മണര്ക്കഭിമുഖമായി മൂന്ന് പ്രദക്ഷിണം വെയ്ച്ചു.
തിടമ്പുകളില് നിന്നും ദേവചൈതന്യം വാളുകളിലേക്ക് ആവാഹിക്കപ്പെടുമെന്നാണ് വിശ്വാസം. തുടര്ന്ന് കുടിപതികള് പൂവറക്കും അമ്മാറക്കല് തറയ്ക്കും മധ്യേയുള്ള സ്ഥാനത്ത് കുടിപതികളുടെ നേതൃത്വത്തില് തേങ്ങയേറ് നടത്തി.നാലാമത് വലിയവട്ടളം പായസം ഭഗവാന് നിവേദിച്ചു.തുടര്ന്ന് കൂത്ത് സമര്പ്പണവും നടന്നു. നാളെ വറ്റടി നടക്കും. ശാന്തി പടിഞ്ഞീറ്റയും ഉഷകാമ്പ്രവും അക്കരെയില് എത്തി സ്വയംഭൂവിനെ അഷ്ടബന്ധം കൊണ്ട് ആവരണം ചെയ്ത് ഒരു ചെമ്പ് ചോറ് നിവേദിച്ചശേഷം മടങ്ങും. ഇതോടെ അക്കരെ സന്നിധാനം 11 മാസക്കാലം നിശ്ബ്ദദയിലമരും. ഒരു മാസക്കാലമായി നടന്നുവന്ന ഉത്സവത്തിന് കേരളത്തിനകത്തു നിന്നും പുറത്തുനിന്നുമായി ലക്ഷക്കണക്കിന് ഭക്തരാണ് എത്തിയത്.
