മോസ്കോ: കോണ്ഫെഡറേഷന് കപ്പില് ഇന്ന് റഷ്യക്ക് എതിരാളികള് പോര്ച്ചുഗല്. മറ്റൊരു മത്സരത്തില് ന്യൂസിലാന്ഡ് മെക്സിക്കോയുമായും ഏറ്റുമുട്ടും.ന്യൂസിലാന്ഡിനെ ആദ്യ മത്സരത്തില് 2-0ന് തോല്പ്പിച്ചതിന്റെ ആത്മവിശ്വാസവുമായാണ് ആതിഥേയരായ റഷ്യ ഇന്ന് പോര്ച്ചുഗലിനെതിരെ രണ്ടാം കളിക്ക് ഇറങ്ങുന്നത്. പോര്ച്ചുഗല് ആദ്യ കളിയില് മെക്സിക്കോയോട് 2-2ന് സമനില പാലിച്ചിരുന്നു.
മികച്ച താരനിരയുമായാണ് പോര്ച്ചുഗല് ടൂര്ണമെന്റിനെത്തിയത്. എന്നാല് ആദ്യ മത്സരത്തില് മെക്സിക്കോക്കെതിരെ പേരിനൊത്ത പ്രകടനം പുറത്തെടുക്കാന് നിലവിലെ യൂറോകപ്പ് ചാമ്പ്യന്മാരായ പറങ്കികള്ക്ക് കഴിഞ്ഞില്ല. ടീമിലെ സൂപ്പര്താരായ ക്രിസ്റ്റിയാനോ റൊണാള്ഡോക്ക് ആദ്യ മത്സരത്തില് ഗോളടിക്കാന് കഴിഞ്ഞിരുന്നില്ലെങ്കിലും ആദ്യ ഗോളിന് വഴിയൊരുക്കിയത് ലോക ഫുട്ബോളറായിരുന്നു. ഇന്ന് ക്രിസ്റ്റിയാനോ ഗോളടിക്കുമെന്ന പ്രതീക്ഷയിലാണ് പറങ്കിപ്പട. ആദ്യ മത്സരത്തില് ഗോളടിച്ച ക്വറെസ്മയും സോറസും മികച്ച പ്രകടനം നടത്തുന്നു.
ആദ്യ മത്സരത്തില് പരിക്കു സമയത്ത് വഴങ്ങിയ ഗോളാണ് പോര്ച്ചുഗലിന്റെ വിജയം തട്ടിത്തെറിപ്പിച്ചത്. മികച്ച പ്രതിരോധനിരയുണ്ടെങ്കിലും നിര്ണായക സമയത്ത് അവര്ക്ക് പിഴക്കുകയായിരുന്നു.
ന്യൂസിലാന്ഡിനെ തോല്പ്പിച്ച ആത്മവിശ്വാസമാണ് ആതിഥേയരായ റഷ്യയുടെ കരുത്ത്. മികച്ച താരനിരയുള്ള റഷ്യ സ്വന്തം നാട്ടില് നടക്കുന്ന മത്സരങ്ങളില് അത്ഭുതങ്ങള് സൃഷ്ടിക്കാന് കെല്പുള്ളവരാണ്. 22 മത്സരങ്ങളില് നിന്ന് 8 ഗോളുകളടിച്ച ഫെഡോര് സ്മോളോവാണ് ടീമിലെ മുഖ്യസ്ട്രൈക്കര്. മുന്പ് ഇരുടീമുകളും കളിച്ച ആറ് കളികളില് മൂന്നെണ്ണത്തില് വിജയം പറങ്കികള്ക്കൊപ്പം നിന്നപ്പോള് റഷ്യ ജയിച്ചത് രണ്ടെണ്ണം. അവസാനം ഇരുടീമുകളും ഏറ്റുമുട്ടിയത് 2015 നവംബര് 14ന്. അന്ന് നടന്ന രാജ്യാന്തര സൗഹൃദ മത്സരത്തില് റഷ്യ 1-0ന് ജയിക്കുകയും ചെയ്തു.
രണ്ടാം മത്സരത്തില് ന്യൂസിലാന്ഡിനെതിരെ അനായാസ വിജയം പ്രതീക്ഷിച്ചാണ് കരുത്തരായ മെക്സിക്കോ ഇറങ്ങുന്നത്. ആദ്യ മത്സരത്തില് പോര്ച്ചുഗലിനെ പിടിച്ചുകെട്ടിയതിന്റെ ആത്മവിശ്വാസത്തിലാണ് അവര്. ജാവിയര് ഹെര്ണാണ്ടസ്, ജിയോവാനി സാന്റോസ്, കാര്ലോസ് വെല, ആന്ദ്രെ ഗുര്ഡാഡോ, ഹെക്ടര് ഹെരേര, അക്വിനോ, റാഫേല് മാര്ക്വേസ്, ഹെക്ടര് മൊറേനോ, കാര്ലോസ് സാല്സെഡോ തുടങ്ങിയവരാണ് മെക്സിക്കന് നിരയിലെ പ്രധാനികള്.
ന്യൂസിലാന്ഡിന് ഇതുവരെ മെക്സിക്കോയെ പരാജയപ്പെടുത്താന് കഴിഞ്ഞിട്ടില്ല. കളിച്ച അഞ്ച് കളികളും തോല്ക്കാനായിരുന്നു വിധി. അതിനൊരു മാറ്റമാണ് ന്യൂസിലാന്ഡ് സ്വപ്നം കാണുന്നത്.
