ന്യൂദൽഹി: ഡാർജലിംഗിലെ പ്രതിസന്ധിക്ക് പരിഹാരം കാണാൻ ഗൂർഖ ജനമുക്തി മോർച്ച (ജിജെഎം) നേതാക്കൾ തയ്യാറാകണമെന്ന് കേന്ദ്ര ആഭ്യന്തമന്ത്രി രാജ്നാഥ് സിംഗ് ആവശ്യപ്പെട്ടു. പ്രതിഷേധവും ആക്രമണങ്ങളുമല്ല ഇതിന് പരിഹാരം മറിച്ച് സർക്കാരുമായിട്ടുള്ള ചർച്ചകളാണ് വേണ്ടതെന്നും അദ്ദേഹം പറഞ്ഞു.
ഇപ്പോൾ പ്രദേശത്ത് ഉടലെടുത്ത പ്രശ്നങ്ങൾക്ക് അക്രമങ്ങൾ കൊണ്ട് പരിഹാരം നൽകാനാവില്ല, സർക്കാരുമായി ചർച്ചകൾ നടത്തി പ്രശ്നം പരിഹരിക്കാൻ ശ്രമിക്കുകയാണ് വേണ്ടത്-രാജ്നാഥ് സിംഗ് പറഞ്ഞു. ഡാർജലിംഗിലെ ജനങ്ങൾ അക്രമങ്ങൾ വെടിഞ്ഞ് പ്രദേശത്ത് സമാധാനം പുനസ്ഥാപിക്കണമെന്നും അദ്ദേഹം ആവശ്യപ്പെട്ടു.
അതേ സമയം ഗൂർഖ ജനമുക്തി മോർച്ച ഡാർജലിംഗ് മേഖലയിൽ നടത്തുന്ന പ്രക്ഷോഭം കൂടുതൽ കലുഷിതമാകുകയാണ്. ശനിയാഴ്ച നടന്ന സംഘർഷത്തിൽ കൊല്ലപ്പെട്ട തങ്ങളുടെ പ്രവർത്തകരുടെ ശവശരീരവുമായി മാർച്ച് നടത്തുമെന്ന് ഗൂർഖ ജനമുക്തി മോർച്ച നേതാക്കൾ അറിയിച്ചിരുന്നു.
ശനിയാഴ്ച്ച സംഘടനയും പോലീസും തമ്മിലുണ്ടായ സംഘർഷത്തിൽ ഒരു പോലീസുകാരനും കുത്തേറ്റ് കൊല്ലപ്പെട്ടിരുന്നു.
