കൊച്ചി: അറിവ് രാജ്യത്തിന്റെ സാമൂഹ്യ-സാമ്പത്തിക വളര്ച്ചക്ക് സഹായകമാകുമെന്നും വായിക്കുമെന്ന് ശപഥമെടുക്കാന് യുവാക്കള് തയാറാകണമെന്നും പ്രധാനമന്ത്രി നരേന്ദ്ര മോദി. പി.എന്. പണിക്കര് ഫൗണ്ടേഷന്റെ ആഭിമുഖ്യത്തില് ദേശീയ വായനാദിന മാസാചരണത്തിന്റെ ഉദ്ഘാടനം സെന്റ്തെരേസാസ് ഓഡിറ്റോറിയത്തില് നിര്വഹിക്കുകയായിരുന്നു പ്രധാനമന്ത്രി.
ഉപനിഷത്തുകാലം മുതല് ഡിജിറ്റല് കാലമായ ഇന്നും വായനയുടെയും വിജ്ഞാന സമ്പാദനത്തിന്റെയും പ്രസക്തി നിലനില്ക്കുന്നു. വായനയേക്കാള് ആഹ്ലാദം നല്കുന്ന ഒന്നും, അറിവിനേക്കാള് കരുത്തുള്ള ഒന്നും ഇല്ല, പ്രധാനമന്ത്രി പറഞ്ഞു.
ഗവര്ണര് പി. സദാശിവം അദ്ധ്യക്ഷത വഹിച്ചു. രാജ്യസഭാ ഉപാദ്ധ്യക്ഷന് പ്രൊഫ.പി.ജെ. കുര്യന്, എംപിമാരായ സുരേഷ് ഗോപി, പ്രൊഫ. കെ.വി. തോമസ്, ബിജെപി സംസ്ഥാന അധ്യക്ഷന് കുമ്മനം രാജശേഖരന് എന്നിവര് പങ്കെടുത്തു. പി.എന്. പണിക്കര് ഫൗണ്ടേഷന് വൈസ് ചെയര്മാന് എന്. ബാലഗോപാല് സ്വാഗതം പറഞ്ഞു.
വായന മാസാഘോഷത്തിന്റെ ലോഗോ പ്രകാശനം പ്രധാനമന്ത്രി നിര്വഹിച്ചു. യോഗ പൈതൃകം മാസികയുടെ പതിപ്പ് പതഞ്ജലി യോഗ ട്രെയിനിങ് പ്രസിഡന്റ് കൈതപ്രം വാസുദേവന് നമ്പൂതിരിക്ക് നല്കി പ്രധാനമന്ത്രി പുറത്തിറക്കി.
കേരളത്തിന്റെ സമ്പൂര്ണ്ണ സാക്ഷരതാ നേട്ടങ്ങളെ മോദി പ്രശംസിച്ചു. സര്ക്കാരിന്റെ പ്രവര്ത്തനം മാത്രമല്ല, പൗരന്മാരുടെയും സന്നദ്ധസംഘടനകളുടെയും പ്രവര്ത്തന ഫലം കൂടിയാണിത്. പി. എന്. പണിക്കര് ഇൗ രംഗത്ത് സമര്പ്പിക്കപ്പെട്ട വ്യക്തിത്വമാണ്. പണിക്കര് ഫൗണ്ടേഷന്റെ പ്രവര്ത്തനം പ്രശംസനീയമാണ്, മോദി പറഞ്ഞു.
വിജ്ഞാനം അവരവരുടെ പ്രവൃത്തിമേഖലയില് മാത്രം ഒതുക്കരുത്. അറിവ് സാമൂഹ്യ പ്രതിബദ്ധതയും സേവന മനസും രാജ്യസേവന ഭാവവും വളര്ത്തും. അറിവ് സാമൂഹ്യ ശാപങ്ങള്ക്കും ദേശീയ പ്രശ്നങ്ങള്ക്കും പരിഹാരം കാണാന് സഹായിക്കും. അറിവ് രാജ്യത്ത് ശാന്തിയും ഐക്യവും അഖണ്ഡബോധവും വളര്ത്തും.
പി. എന്. പണിക്കര് ഫൗണ്ടേഷന് സര്ക്കാര്-സ്വകാര്യ ഏജന്സികളും വിവിധസംഘടനകളുമായി ചേര്ന്ന് വായനപോഷിപ്പിക്കാന് സംരംഭം ആരംഭിച്ചിട്ടുണ്ട്. 2022 -ല് 300 കോടി ജനങ്ങളിലും വായനശീലം വളര്ത്തുകയാണ് ലക്ഷ്യം.
ഞാന് ഗുജറാത്ത് മുഖ്യമന്ത്രിയായിരിക്കെ വായന പോഷിപ്പിക്കാന് വാച്ഛേ ഗുജറാത്ത് എന്നൊരു പ്രസ്ഥാനം ആരംഭിച്ചു. യുവാക്കളെ വായനയോടടുപ്പിക്കാനുള്ള പദ്ധതിയായിരുന്നു. ഞാന് ചില ഗ്രന്ഥശാലകള് സന്ദര്ശിച്ചു. ഗ്രന്ഥ ക്ഷേത്രങ്ങള് ഉണ്ടാക്കാന് ഞാന് നിര്ദ്ദേശിച്ചു. സന്ദര്ശന വേളകളില് പൂച്ചെണ്ടുകള്ക്കു പകരം പുസ്തകം (ബൊക്കെക്കു പകരം ബുക്ക്) നല്കാന് നിര്ദ്ദേശിച്ചു, മോദി പറഞ്ഞു. പരിപാടിയില് പൂച്ചെണ്ടിനു പകരം പുസ്തകം നല്കിയതിനെ മോദി പ്രശംസിച്ചു.
സംസ്ഥാനത്തെ 18 പൊതുവായന ശാലകളില് ഡിജിറ്റല് ലൈബ്രറികള് സ്ഥാപിക്കാന് ദല്ഹിയിലെ പബ്ലിക്ലൈബ്രറി മൂവ്മെന്റുമായി സഹകരിച്ച് പണിക്കര് ഫൗണ്ടേഷന് പ്രവര്ത്തിക്കുന്നതായി അറിഞ്ഞു. ഈ പ്രവര്ത്തനം രാജ്യവ്യാപകമാക്കണമെന്നാണ് എന്റെ അഭിപ്രായം. കേന്ദ്ര സര്ക്കാര് ഫൗണ്ടേഷന്റെ പ്രവര്ത്തനങ്ങള്ക്ക രണ്ടു വര്ഷമായി 1.2 കോടി രൂപ നല്കിയെന്നും മോദി പറഞ്ഞു.
