ഉഴവൂര്: സംസ്ഥാന പ്രസിഡന്റ് ഉഴവൂര് വിജയനെതിരെ എന്സിപിയില് പടനീക്കം.
പാലാ നിയമസഭാ സ്ഥാനാര്ത്ഥി ആയിരുന്ന മാണി സി കാപ്പന്റെ നേതൃത്വത്തിലാണ് ഒരു വിഭാഗം രംഗത്തെത്തിയിട്ടുള്ളത്. തെരഞ്ഞെടുപ്പ് തോല്വി ഉയര്ത്തിയാണ് ആരോപണങ്ങളിലേറെയും.
കാപ്പന് വിഭാഗത്തിന് അനുകൂലമായി മന്ത്രി തോമസ് ചാണ്ടിയും രംഗത്തുവന്നിട്ടുണ്ട്. ഏ.കെ. ശശീന്ദ്രന്റെ ഫോണ് വിവാദവും ചാണ്ടിയുടെ മന്ത്രിസ്ഥാനവുമെല്ലാം ഉഴവൂരിനെതിരെ ശക്തമായ ആരോപണങ്ങളായി എതിര് പക്ഷം ഉയര്ത്തിപ്പിടിക്കുന്നു.
പാലായില് കെ.എം. മാണിക്കെതിരെ വിജയപ്രതീക്ഷ പുലര്ത്തിയ മാണി സി കാപ്പന് ചുരങ്ങിയ വോട്ടുകള്ക്കാണ് തോല്വി ഏറ്റുവാങ്ങിയത്. ഇതിന് കാരണം ഉഴവൂര് വിജയനാണെന്നാണ് പാര്ട്ടിയിലെ ഒരു വിഭാഗത്തിന്റെ വാദം.
ഇലക്ഷന് മുന്നോടിയായി കോണ്ഗ്രസ് നേതാവ് സാബു എബ്രാഹം ഇടതുപക്ഷ പാളയത്തിലെത്തിയതും ബിജെപിയുടെ ശക്തമായ പ്രചാരണവും കാപ്പനില് വിജയപ്രതീക്ഷ ഉയര്ത്തിയിരുന്നു. എന്നാല് ഇലക്ഷന് സമയത്ത് പല സന്ദര്ഭങ്ങളിലും ഉഴവൂര് വിജയന് കാപ്പനെതിരെ പ്രവര്ത്തിച്ചതായി ഒരു വിഭാഗം ആരോപിക്കുന്നു. വിജയന് ഇതിനായി പാര്ട്ടിയുടെ പ്രാദേശിക നേതാവ് ജയ്സണ് കൊല്ലപ്പള്ളി അടക്കമുള്ളവരെ ഉപയോഗിച്ചതായും ആരോപണമുണ്ട്.
തോമസ് ചാണ്ടിയെ മന്ത്രിസഭയില് ഉള്പ്പെടുത്താതിരിക്കാന് ഉഴവൂര് വിജയന് ശ്രമം നടത്തിയെന്നാണ് ചാണ്ടി വിഭാഗം നേതാക്കള് ഉയര്ത്തുന്ന പ്രധാന ആരോപണം. ചാണ്ടിയുടെ മന്ത്രിസ്ഥാനം നീട്ടിക്കൊണ്ടുപോകുവാനുള്ള പ്രധാനകാരണക്കാരന് ഉഴവൂര് വിജയനെന്നാണ് ചാണ്ടി വിഭാഗത്തിന്റെ വിലയിരുത്തല്. ഉഴവൂര് വിജയനെ പാര്ട്ടി പ്രസിഡന്റ് സ്ഥാനത്തുനിന്ന് മാറ്റണമെന്ന ആവശ്യവുമായി ചാണ്ടി വിഭാഗവും കാപ്പന് വിഭാഗവും കേരളത്തിന്റെ ചുമതലയുള്ള ജനറല് സെക്രട്ടറി പ്രഫുല് പട്ടേലിനെ കണ്ട് ആവശ്യങ്ങളുന്നയിച്ചുവെന്ന് പാര്ട്ടി വൃത്തങ്ങള് തന്നെ സൂചിപ്പിക്കുന്നു. സംസ്ഥാന നേതാക്കള്ക്കൊപ്പം പ്രാദേശിക ഘടകത്തിന്റെ എതിര്പ്പും ഉഴവൂരിന്റെ സ്ഥാന ചലനത്തിന് കാരണമാകുമെന്നാണ് രാഷ്ട്രീയ നിരീക്ഷണം.
