കൊച്ചി: പ്രധാനമന്ത്രിക്കൊപ്പം മെട്രോയില് യാത്രചെയ്തതിനെ തുടര്ന്നുണ്ടായ വിമര്ശനങ്ങള്ക്ക് മറുപടിയുമായി ബിജെപി സംസ്ഥാന അദ്ധ്യക്ഷന് കുമ്മനം രാജശേഖരന്. പ്രധാനമന്ത്രിയുടെ ഓഫീസും കേരള പോലീസും എസ്.പി.ജിയും പറഞ്ഞതനുസരിച്ചാണ് താന് പ്രധാനമന്ത്രിക്കൊപ്പം യാത്രചെയ്തത്.
മെട്രോ ഉദ്ഘാടനത്തിന്റെ പ്രഭ കെടുത്താന് ചില ഗൂഢശക്തികള് ശ്രമിക്കുന്നുണ്ട്. അവരുടെ കയ്യിലെ കളിപ്പാവയായി മാറരുതെന്ന്, സമൂഹമാധ്യമത്തിലൂടെ യാത്രാവിവാദം ഉയര്ത്തിയ മന്ത്രി കടകംപള്ളി സുരേന്ദ്രനെ കുമ്മനം ഓര്മിപ്പിച്ചു. സുരക്ഷാ വീഴ്ച സംഭവിച്ചിട്ടുണ്ടെങ്കില് അതിന് ഉത്തരവാദി മുഖ്യമന്ത്രിയാണെന്നും യാത്രാവിവാദത്തെക്കുറിച്ചു മുഖ്യമന്ത്രി പ്രതികരിക്കണമെന്നും കുമ്മനം ആവശ്യപ്പെട്ടു.
പ്രധാനമന്ത്രിയുടെ വാഹനവ്യൂഹത്തിനൊപ്പം കേരള സര്ക്കാര് ഏര്പ്പെടുത്തിയ വാഹനത്തിലാണ് താനും പാലാരിവട്ടം മെട്രോ സ്റ്റേഷനില് എത്തിയത്. നാവിക വിമാനത്താവളത്തില് പ്രധാനമന്ത്രിയെ സ്വീകരിക്കാനും, പരിപാടി കഴിഞ്ഞ് യാത്രയാക്കാനും താനുണ്ടായിരുന്നു.
ഈ സമയത്ത് കേരള പോലീസോ, പ്രധാനമന്ത്രിയുടെ സുരക്ഷാ ചുമതലയുള്ള എസ്പിജിയോ തന്നെ തടഞ്ഞില്ല. മാത്രമല്ല, എനിക്ക് ആവശ്യമായ സഹായങ്ങളും അവര് ചെയ്തുതന്നു. എന്നിട്ടുപോലും ഇതെല്ലാം വിവാദമാക്കുന്നതിനു പിന്നില് ഗൂഢലക്ഷ്യങ്ങളുണ്ടെന്നും കുമ്മനം വ്യക്തമാക്കി.
സംസ്ഥാന സര്ക്കാരിന്റെ വാഹനത്തിലാണു ഞാന് യാത്ര ചെയ്തത്. പ്രധാനമന്ത്രിയോടൊപ്പം യാത്ര ചെയ്യാനുള്ള വാഹനം ഏര്പ്പാടാക്കിയതും സര്ക്കാരാണ്. പ്രധാനമന്ത്രിയുടെ വാഹനത്തിനു തൊട്ടുപിന്നാലെയുള്ള വാഹനവ്യൂഹത്തില് ഞാനുമുണ്ടായിരുന്നു. ഇതിനൊക്കെ ആരാണു സൗകര്യങ്ങള് ചെയ്തുതന്നത്? ഇതൊന്നും അറിയാതെ മന്ത്രി കടകംപള്ളി സുരേന്ദ്രന് വെറുതെ പച്ചക്കള്ളം പറയുകയാണ്.
മുഖ്യമന്ത്രി പിണറായി വിജയന് ഇക്കാര്യത്തില് പ്രതികരിക്കട്ടെ. അദ്ദേഹമാണ് ഇതിന്റെ ഉത്തരവാദി. കേരളത്തില് പ്രധാനമന്ത്രി എത്തുന്ന സന്ദര്ഭത്തില് അദ്ദേഹത്തോടൊപ്പം ആരൊക്കെ യാത്ര ചെയ്യുന്നു എന്നതിനെപ്പറ്റി മുഖ്യമന്ത്രിക്കു യാതൊന്നും അറിയാന് പാടില്ലെന്നു പറയാന് പറ്റുമോ? പ്രധാനമന്ത്രിയെ സ്വീകരിക്കുമ്പോള് താന് എയ്റോഡോമില് ഉണ്ടായിരുന്നല്ലോ.
യാത്രയാക്കുന്ന സന്ദര്ഭത്തിലും മുഖ്യമന്ത്രിയോടൊപ്പം ഞാനുണ്ടായിരുന്നു. ഭാരതം ഭരിക്കുന്ന രാഷ്ട്രീയ കക്ഷിയുടെ സംസ്ഥാന പ്രസിഡന്റ് പ്രധാനമന്ത്രിയോടൊപ്പം യാത്രചെയ്തതു വലിയ വിവാദമാണോ? അനുവാദമില്ലാതെ പ്രധാനമന്ത്രിയോടൊപ്പം യാത്ര ചെയ്യാന് പറ്റുമോ? മുഖ്യമന്ത്രിയോടൊപ്പമല്ലേ താനും യാത്ര ചെയ്തത്.
എന്തെങ്കിലും എതിര്പ്പുണ്ടായിരുന്നെങ്കില് മുഖ്യമന്ത്രിക്കു പറയാമായിരുന്നല്ലോ. ഇതേപ്പറ്റി കടകംപള്ളി സുരേന്ദ്രന് ആദ്യം ചോദിക്കേണ്ടതു മുഖ്യമന്ത്രിയോടാണ്. മുഖ്യമന്ത്രിയുടെ മുഖത്തുനോക്കി, വിരല്ചൂണ്ടി പറയണം, നിങ്ങളാണു സുരക്ഷാവീഴ്ച വരുത്തിയത്. ഇതു പറയാനുള്ള ആര്ജവം കടകംപള്ളി സുരേന്ദ്രനുണ്ടോ?
നേരത്തെ കുമ്മനം പ്രധാനമന്ത്രിക്കൊപ്പം മെട്രോയില് യാത്ര ചെയ്തത് പ്രധാനമന്ത്രിയുടെ അനുമതിയോടെയാണെന്ന് കെഎംആര്എല് എംഡി ഏലിയാസ് ജോര്ജ് വ്യക്തമാക്കിയിരുന്നു.
എന്നാല് കുമ്മനത്തിന്റെയും ഒ.രാജഗോപാലിന്റെയും പേരുകള് പിഎംഒ നല്കിയ പട്ടികയില് ഉള്പ്പെടുത്തിയിരുന്നു. എന്നാല് കൊച്ചിയില് എത്തിച്ചേരാന് സാധിക്കാത്തതിനാലാണ് രാജഗോപാലിന് യാത്രയില് പങ്കാളിയാകാന് സാധിക്കാതെ പോയത്. എട്ടാമത്തെ ആളായി കുമ്മനം രാജശേഖരനെ പട്ടികയില് ഉള്പ്പെടുത്തിയിരുന്നു.
