ഇടുക്കി: മൂന്നാര് ഗുണ്ടുമല എസ്റ്റേറ്റില് അധ്യാപികയെ വെട്ടിക്കൊന്ന കേസില് പോലീസിന്റെ കസ്റ്റഡിയിലുള്ള പഴനിസ്വാമി പോലീസിനെ നുണക്കഥകള് പറഞ്ഞ് വട്ടം ചുറ്റിക്കുന്നു. സംഭവം നടന്ന് മണിക്കൂറുകള്ക്കകം ഇയാള് പോലീസിന്റെ വലയിലായിരുന്നു.
ഇയാളുടെ പാന്റ്സിലെ രക്തക്കറയും കയ്യിലെ മുറിവുമാണ് പോലീസിനെ സംശയത്തില് എത്തിച്ചത്.
കൊലപാതകം നടന്ന ചൊവ്വാഴ്ച പഴനിസ്വാമി ഡേ കെയറില് എത്തി മുറികള് വൃത്തിയാക്കിയിരുന്നു. ഇതിന് ശേഷം പകല് മൂന്ന് മണി വരെ ഇയാള് എവിടെയായിരുന്നെന്നാണ് പോലീസിന് ഉത്തരം കിട്ടാത്തത്. കയ്യിലെ മുറിവ് ചാണകം ചുമന്നപ്പോള് ഗേറ്റില് തട്ടിയുണ്ടായി എന്നാണ് പോലീസിനോട് പറഞ്ഞിരിക്കുന്നത്. കൊലപാതകം നടന്നിടത്ത് നിന്ന് ലഭിച്ച ശാസ്ത്രീയ തെളിവുകളുടെ ഫലം വൈകുന്നതാണ് പോലീസിനെ കുഴയ്ക്കുന്ന മറ്റൊരു സംഗതി.
ഇതിനിടെ തമിഴ്നാട്ടിലേക്ക് പോയ ഒരാളെ പോലീസ് വിളിച്ചുവരുത്തി മൊഴിയെടുത്ത് വിട്ടയച്ചു. ഇന്നലെ പഴനിസ്വാമിയുടെ വീട്ടില് പോലീസ് സംഘം പരിശോധന നടത്തിയിരുന്നു. വിവരങ്ങള് എന്തെങ്കിലും ലഭിച്ചതായി പോലീസ് വെളിപ്പെടുത്തിയിട്ടില്ല.
