കണ്ണൂര്: കേസ് നടത്താന് വിദ്യാര്ത്ഥികളില് നിന്നും പണം പിരിവ്. കണ്ണൂര് ജില്ലയിലെ അഞ്ചരക്കണ്ടി മെഡിക്കല് കോളേജ് അധികൃതരുടെ നടപടിയില് പ്രതിഷേധം. ജെയിംസ് കമ്മറ്റി റിപ്പോര്ട്ട് അവഗണിച്ച് വിദ്യാര്ത്ഥി പ്രവേശനം നടത്തിയതിനെ തുടര്ന്ന് കോളേജിലെ വിദ്യാര്ത്ഥി പ്രവേശനത്തിന്റെ സാധുത കോടതി തടഞ്ഞുവെച്ചിരിക്കുകയാണ്.
നിയമനത്തിന്റെ സാധുതക്ക് വേണ്ടി സുപ്രീം കോടതിയെ സമീപിക്കാന് ആവശ്യമായ തുക വിദ്യാര്ത്ഥികളില് നിന്നും പിരിച്ചെടുക്കുന്നതാണ് വിവാദമായിരിക്കുന്നത്. 25000 രൂപയാണ് കേസ് നടത്തിപ്പിനായി വിദ്യാര്ത്ഥികളില് നിന്നും പിരിച്ചെടുക്കുന്നതെന്നാണ് ആരോപണം ഉയര്ന്നിരിക്കുന്നത്.
കോളേജ് അധികൃതരുടെ നടപടിക്കെതിരെ നിരവധി രക്ഷിതാക്കള് പരാതിയുമായി രംഗത്തെത്തിയിട്ടുണ്ട്. റസീറ്റ് പോലും നല്കാതെയാണ് പിരിവ് നടക്കുന്നതെന്നാണ് പരാതി. ഫീസ് കൊടുത്ത് പ്രവേശനം നേടിയ വിദ്യാര്ത്ഥികള് കോളേജ് അധികൃതരുടെ പിടിപ്പുകേടിന്റെ ഫലമായി ഉണ്ടായ കേസിന്റെ പേരില് എന്തിന് പണം നല്കണമെന്നാണ് രക്ഷിതാക്കള് ഉന്നയിക്കുന്ന ചോദ്യം.
അധികൃതരുടെ നടപടിയില് പ്രതിഷേധിച്ച് അഞ്ചരക്കണ്ടി മെഡിക്കല് കോളേജിലേക്ക് ഇന്നലെ വിവിധ യുവജന-വിദ്യാര്ത്ഥി മാര്ച്ച് നടത്തി. നടപടിയില് നിന്നും കോളേജ് അധികൃതര് പിന്മാറിയില്ലെങ്കില് ശക്തമായ പ്രക്ഷോഭത്തിനുളള തയ്യാറെടുപ്പിലാണ് വിവിധ വിദ്യാര്ത്ഥി സംഘടനകള്.
