ശ്രീറാം
പൂനെ: ആ ലഞ്ച് ബ്രേക്കില് എന്താണ് സംഭവിച്ചത്? ഇന്ത്യയുടെ ദയനീയ പരാജയം കണ്ട പൂനെ ടെസ്റ്റിന്റെ ഒന്നാം ഇന്നിംഗ്സില് ന്യൂ ബോള് കിട്ടിയ സ്പിന്നര് സ്റ്റീവ് കീഫിന് ഒന്നും ചെയ്യാന് കഴിഞ്ഞില്ല. ആദ്യത്തെ ഏഴ് ഓവറില് ഇരുപത്തിമൂന്നു റണ്സ് വിട്ടു കൊടുത്തു, വിക്കറ്റൊന്നുമില്ല. അപ്പോഴേക്ക് ഉച്ചഭക്ഷണത്തിനു പിരിഞ്ഞു. എന്നാല് പിന്നീടുള്ള എട്ട് ഓവറില് പന്ത്രണ്ടു റണ്സിനിടയ്ക്ക് കീഫ് വീഴ്ത്തിയത് ആറു വിക്കറ്റുകള്. ഇന്ത്യ 105 റണ്സിനു പുറത്തുമായി.
അര മണിക്കൂര് ഇടവേളില് കീഫ് എന്ന ബൗളര് എന്തു മാജിക്കാണ് തന്റെ ബൗളിങ്ങിലേക്കു കൊണ്ടു വന്നത് എന്നു ചോദിക്കേണ്ടത് ഓസീസിന്റെ സ്പിന് കണ്സള്റ്റന്റ് ശ്രീധരന് ശ്രീറാമിനോടാണ്. കാരണം ഇന്ത്യന് പിച്ചില് ഇത്ര മികവോടെ പന്തെറിയാന് പാകത്തിന് ഓസീസ് സ്പിന്നര്മാരെ ഒരുക്കിയത് ഇന്ത്യയുടെ ഈ മുന് ബാറ്റ്സ്മാനാണ്.
ലഞ്ച് ബ്രേക്കില് കീഫ് വളരെ അസ്വസ്ഥനായിരുന്നു. ന്യൂബോളില് കാര്യമായ ടേണ് കിട്ടാത്തതാണ് കാരണമെന്ന് തോന്നിയിരുന്നു. കീഫുമായി സംസാരിച്ചു. അര മണിക്കൂര് ഗ്യാപ്പില് ബൗള് ചെയ്ത് പരിശീലിക്കുന്നതടക്കം ചില കാര്യങ്ങള് ചെയ്തു. കുറച്ചു കൂടി വേഗത്തില്, ബാറ്റ്സ്മാനെ ബാക് ഫുട്ടിലേക്ക് ഇറങ്ങാന് പ്രേരിപ്പിക്കുന്ന തരത്തില് പന്തെറിയാന് നിര്ദേശിച്ചു. ഈ പ്ലാന് കൃത്യമായി നടപ്പാന് കീഫിനു കഴിഞ്ഞതാണ് പിന്നീടുള്ള രണ്ട് ഇന്നിംഗ്സിലും കണ്ടത്.
2015ലെ ഓസീസ് സന്ദര്ശനം മുതല് താന് കീഫിന്റെ ബൗളിങ്ങിന്റെ കാര്യത്തില് നിര്ദേശങ്ങള് നല്കുന്നുണ്ടെന്ന് ശ്രീറാം പറഞ്ഞു. ഓരോ ദിവസവും പരിശീലിക്കുന്നതിനെക്കുറിച്ച് ഓര്ത്തു വയ്ക്കും കീഫ്. നിര്ദേശങ്ങളെ ഉള്ക്കൊള്ളാനും അതു നടപ്പാക്കാനുള്ള പരിശ്രമവുമാണ് കീഫിന്റെ പ്രത്യേകത. പൂനെയില് ലഞ്ച് ബ്രേക്കിനു മുമ്പുള്ള ഏഴ്് ഓവറിനും പിന്നീടുള്ള എട്ട് ഓവറിനു മിടയില് സംഭവിച്ചതും അതു തന്നെയാണ്്, ശ്രീറാം പറയുന്നു.
