ഹാമില്ട്ടണ്: ഓപ്പണര് മാര്ട്ടിന് ഗുപ്റ്റിലിന്റെ തകര്പ്പന് സെഞ്ചുറിയുടെ കരുത്തില് ദക്ഷിണാ്രഫിക്കക്കെതിരായ നാലാം ഏകദിനത്തില് ന്യൂസിലാന്ഡിന് 7 വിക്കറ്റിന്റെ തകര്പ്പന് വിജയം. ആദ്യം ബാറ്റ് ചെയ്ത് ദക്ഷിണാഫ്രിക്ക 8 വിക്കറ്റ് നഷ്ടത്തില് 279 റണ്സെടുത്തു. മറുപടി ബാറ്റിങ്ങിനിറങ്ങിയ കിവീസ് അഞ്ച് ഓവറും 7 വിക്കറ്റുകളും ബാക്കിനില്ക്കേ 280 റണ്സെടുത്ത് വിജയം കണ്ടു.
138 പന്തുകളില് നിന്ന് 15 ഫോറും 11 സിക്സറുമടക്കം 180 റണ്സെടുത്ത് ഗുപ്റ്റില് പുറത്താകാതെ നിന്നു. കരിയറിലെ 12-ാം ഏകദിന സെഞ്ചുറിയാണ് ഗുപ്റ്റില് ഇന്നലെ തികച്ചത്. 66 റണ്സ് നേടിയ റോസ് ടെയ്ലര് മികച്ച പിന്തുണ നല്കി. ദക്ഷിണാഫ്രിക്കന് നിരയില് 72 റണ്സെടുത്ത് പുറത്താകാതെ നിന്ന ഡിവില്ലിയേഴ്സ് ടോപ് സ്കോറര്. ഡുപ്ലെസിസ് 67 റണ്സുമെടുത്തു. ഇതോടെ പരമ്പര 2-2ന് സമനിലയില്. പരമ്പരയിലെ അവസാന മത്സരം ശനിയാഴ്ച ഓക്ക്ലന്ഡില് നടക്കും.
നേരത്തെ ടോസ് നേടിയ ദക്ഷിണാ്രഫിക്കന് നായകന് എ.ബി. ഡിവില്ലിയേഴ്സ് ബാറ്റിങ്ങ് തെരഞ്ഞെടുത്തു. സ്കോര്ബോര്ഡില് ഒരു റണ് മാത്രമുള്ളപ്പോള് റണ്ണൊന്നുമെടുക്കാതിരുന്ന ക്വന്റണ് ഡി കോക്കിനെ ജീതന് പട്ടേലിന്റെ പന്തില് ലൂക്ക് റോഞ്ചി പിടികൂടി. രണ്ടാം വിക്കറ്റില് ആംലയും ഡു പ്ലെസിസും ചേര്ന്ന് 65 റണ്സ് കൂട്ടിച്ചേര്ത്തു. 40 റണ്സെടുത്ത ആംല പട്ടേലിന്റെ പന്തില് ബൗള്ഡായതോടെ ഈ കൂട്ടുകെട്ട് പിരിഞ്ഞു. പിന്നീടെത്തിയവരില് ആര്ക്കും മികച്ച പ്രകടനം നടത്താന് കഴിഞ്ഞില്ല.
ന്യൂസിലാന്ഡിന് വേണ്ടി ജീതന് പട്ടേല് രണ്ട് വിക്കറ്റ് വീഴ്ത്തി.മറുപടി ബാറ്റിങ്ങിനിറങ്ങിയ കിവീസിന്റെ തുടക്കം നല്ലതായിരുന്നില്ല. സ്കോര് ബോര്ഡില് അഞ്ച് റണ്സ് ആയപ്പോള് തന്നെ ഓപ്പണര് ഡീന് ബ്രൗണ്ലി (നാല്) പവലിയനില് മടങ്ങിയെത്തി. ക്യാപ്റ്റന് കെയ്ന് വില്യംസണ് (21) കൂടി വീണതോടെ അവരുടെ സ്കോര് 77/2 എന്ന നിലയിലായി. മൂന്നാം വിക്കറ്റില് ഗുപ്റ്റിലിന് കൂട്ടായി ടെയ്ലര് എത്തിയതോടെ സ്കോറിംഗ് വേഗത്തില് മുന്നോട്ടുനീങ്ങി.
ടെയ്ലര് വിക്കറ്റ് കളയാതെ സൂക്ഷിച്ചു കളിച്ചപ്പോള്, അടിച്ചു തകര്ക്കാനുള്ള മൂഡിലായിരുന്നു ഗുപ്റ്റില്. വിജയത്തിന് തൊട്ടരികെ റോസ് ടെയ്ലര് പുറത്തായെങ്കിലും ലൂക്ക് റോഞ്ചിയെ സാക്ഷിനിര്ത്തി ഗുപ്റ്റില് ടീമിനെ വിജയത്തിലെത്തിച്ചു.
