മാഡ്രിഡ്: സ്പാനിഷ് ലീഗ് ഫുട്ബോളില് റയല് മാഡ്രിഡിന് അപ്രതീക്ഷിത സമനില. ലാസ് പല്മാസിനെതിരായ കളിയില് തോല്വി മുന്നില്ക്കണ്ട റയല് സൂപ്പര് താരം ക്രിസ്റ്റിയാനോ റൊണാള്ഡോയുടെ ഇരട്ട ഗോളിന്റെ കരുത്തിലാണ് സമനില പിടിച്ചുവാങ്ങിയത്. മൂന്നു മിനിറ്റിനിടെയായിരുന്നു റൊണാള്ഡോയുടെ ഗോളുകള്. 85-ാം മിനിറ്റുവരെ ഒന്നിനെതിരെ മൂന്ന് ഗോളുകള്ക്ക് പിന്നിട്ടുനിന്നശേഷമായിരുന്നു റോണോ മാജിക്ക് സാന്റിയാഗോ ബെര്ണാബ്യൂവില് കണ്ടത്. കളിയുടെ 47-ാം മിനിറ്റില് സൂപ്പര്താരം ഗരെത്ത് ബെയ്ല് ചുവപ്പുകാര്ഡ് കണ്ട് പുറത്തുപോയ ശേഷം റയല് പത്തുപേരുമായാണ് കളിച്ചത്.
ആവേശകരമായ പോരാട്ടത്തിന്റെ 36-ാം സെക്കന്റില് തന്നെ റയല് മൊറാട്ടയിലൂടെ എതിര് വല കുലുക്കിയെങ്കിലും റഫറി ഓഫ് സൈഡ് വിളിച്ചു. എന്നാല് എട്ടാം മിനിറ്റില് ഇസ്കോയിലൂടെ റയല് ലീഡ് നേടിയപ്പോള് അനായാസം അവര് വിജയം നേടുമെന്ന് തോന്നിച്ചു.
മൈതാനമധ്യത്തുനിന്ന് നീട്ടിക്കിട്ടിയ പന്ത് ഇസ്കോയ്ക്ക് ലഭിക്കുമ്പോള് പല്മാസ് താരങ്ങള് ഓഫ് സൈഡിന് വേണ്ടി വാദിക്കുകയായിരുന്നു. പന്ത് കിട്ടിയ ഇസ്കോ ഒന്ന് മുന്നേറിയശേഷം പായിച്ച ഷോട്ട് അനായാസം വലയില് കയറി. ലീഡ് നേടിയ റയലിന്റെ ആഹ്ലാദം രണ്ട് മിനിറ്റുകൊണ്ട് അവസാനിച്ചു. ഡേവിഡ് സിമോണിന്റെ പാസില് നിന്ന് ടാന പല്മാസിന്റെ സമനില ഗോള് കണ്ടെത്തി. പിന്നീട് ഇരുടീമുകളും ഉജ്ജ്വലമായി പൊരുതിയെങ്കിലും ഗോള് പിറക്കാതിരുന്നതോടെ ആദ്യ പകുതി 1-1 എന്ന നിലയില്.
രണ്ടാം പകുതിയിലും ഇരുടീമുകളും വാശിയേറിയ പോരാട്ടമാണ് നടത്തിയത്. എന്നാല് 47-ാം മിനിറ്റില് ഗെയ്ല് ചുവപ്പുകാര്ഡ് കണ്ട് പുറത്തുപോയത് റയലിന് തിരിച്ചടിയായി. 55-ാം മിനിറ്റില് പല്മാസിന് പെനാല്റ്റി. റയല് ക്യാപ്റ്റന് സെര്ജിയോ റാമോസ് ബോക്സിനുള്ളില് വച്ച് പന്ത് കൈകൊണ്ട് തൊട്ടതിനാണ് സ്പോട്ട് കിക്ക്. വിയേറ എടുത്ത കിക്കിന് എതിര്വശത്തേക്ക് ചാടിയ റയല് ഗോളി കെയ്ലര് നവാസ് പന്ത് കാലുകൊണ്ട് തട്ടിപുറത്താക്കാന് ശ്രമിച്ചെങ്കിലും കഴിഞ്ഞില്ല. പല്മാസ് 2-1ന് മുന്നില്. മൂന്നുമിനിറ്റിനുശേഷം പല്മാസ് വീണ്ടും ലീഡ് ഉയര്ത്തി.
ബോട്ടെങ്ങാണ് ഇത്തവണ ലക്ഷ്യം കണ്ടത്. പ്രതിരോധം മറന്ന് കളിച്ചതിനുള്ള ശിക്ഷയായി റയലിന് ഈ ഗോള്. രണ്ട് ഗോളിന് പിന്നിലായതോടെ കരിം ബെന്സേമയും റോഡ്രിഗസും പകരക്കാരുടെ വേഷത്തില് കളത്തിലെത്തി. ഇത് റയലിന് ഗുണം ചെയ്തു. എങ്കിലും 85-ാം മിനിറ്റ് വരെ റയല് 3-1ന് പിന്നില്. പല്മാസ് വിജയം ഏറെക്കുറെ ഉറപ്പിക്കുകയും ചെയ്ത നിമിഷം. തൊട്ടടുത്ത മിനിറ്റില് ക്രിസ്റ്റിയാനോയുടെ ഷോട്ട് ലാസ് പല്മാസിന്റെ ഡാനി ബോക്സിനുള്ളില് വച്ച് കൈകൊണ്ട് തടുത്തതിന് റയലിന് പെനാല്റ്റി. കിക്കെടുത്ത ക്രിസ്റ്റിയാനോക്ക് ലക്ഷ്യം പിഴച്ചില്ല (2-3). മൂന്നുമിനിറ്റിനുശേഷം ജെയിംസ് റോഡ്രിഗസ് എടുത്ത കോര്ണര് തകര്പ്പന് ഹെഡ്ഡറിലൂടെ ക്രിസ്റ്റിയാനോ വലയിലെത്തിച്ചപ്പോള് റയലിന് സ്വന്തമായത് വിജയത്തോളം പോന്ന സമനില. നാളെ നടക്കുന്ന എവേ മത്സരത്തില് ഐബറാണ് റയലിന്റെ എതിരാളികള്.
