തിരുവനന്തപുരം: സംസ്ഥാനത്ത് സ്ത്രീകള് പിച്ചിച്ചീന്തപ്പെടുമ്പോള് മുഖ്യമന്ത്രി കാഴ്ചക്കാരനായി നില്ക്കുകയാണെന്ന് പ്രതിപക്ഷം. വാളയാര്, കല്പ്പറ്റ, കൊട്ടിയൂര് പീഡനങ്ങളുടെ പശ്ചാത്തലത്തില് സ്ത്രീകള്ക്കെതിരെ ഉയര്ന്നുവരുന്ന ആക്രമണങ്ങളില് സഭ നിര്ത്തി വച്ച് ചര്ച്ച ചെയ്യാത്തതില് പ്രതിഷേധിച്ച് പ്രതിപക്ഷം ഇറങ്ങിപ്പോയി.
വാളയാറിലെ സഹോദരിമാരുടെ ദുരൂഹമരണം, കല്പ്പറ്റയില് പെണ്കുട്ടികള് പീഡനത്തിന് ഇരയായ സംഭവം, കൊട്ടിയൂരില് പാതിരി നടത്തിയ പീഡനം ഇതെല്ലാം അക്കമിട്ട് നിരത്തിയാണ് പ്രതിപക്ഷം സഭയില് സര്ക്കാരിനെതിരെ ആഞ്ഞടിച്ചത്.
വാളയാറിലെ ശെല്വപുരത്ത് ആദ്യ കുട്ടിയുടെ മരണത്തെക്കുറിച്ചുള്ള പരാതി പോലീസ് ലാഘവ ബുദ്ധിയോടെ കണ്ടെന്ന് പ്രതിപക്ഷം വിമര്ശിച്ചു. വാളയാര് സംഭവത്തിലെ പ്രതികള് ഭരണപക്ഷക്കാരായതിനാല് അവര്ക്ക് രാഷ്ട്രീയ സംരക്ഷണം നല്കുകയാണെന്ന് പ്രതിപക്ഷ നേതാവ് രമേശ് ചെന്നിത്തല പറഞ്ഞു. ജിഷകേസിന്റെ അടിസ്ഥാനത്തില് ഡിജിപി സ്ഥാനത്ത് നിന്നും ടി.പി സെന്കുമാറിനെ നീക്കിയതും പ്രതിപക്ഷം ഉന്നയിച്ചു.
ലൈംഗികാതിക്രമ കേസുകളില് കുറ്റവാളി എത്ര ശക്തനായാലും നിയമത്തിന് മുന്നില് കൊണ്ടു വരുമെന്ന് മുഖ്യമന്ത്രി മറുപടി നല്കി.
