ന്യൂദല്ഹി: കേരളത്തിന് ആവശ്യമായ റേഷന് ഭക്ഷ്യധാന്യങ്ങള് നല്കുന്നതില് കേന്ദ്രം വീഴ്ച്ച വരുത്തിയിട്ടില്ലെന്നും മറിച്ചുള്ള പ്രചാരണം അടിസ്ഥാനരഹിതമാണെന്നും കേന്ദ്ര ഭക്ഷ്യവകുപ്പ് മന്ത്രി രാം വിലാസ് പാസ്വാനും സഹമന്ത്രി സി.ആര്.ചൗധരിയും ബിജെപി സംസ്ഥാന അധ്യക്ഷന് കുമ്മനം രാജശേഖരന്റെ നേതൃത്വത്തിലുള്ള എന്ഡിഎ നിവേദക സംഘത്തെ അറിയിച്ചു.
കേരളത്തിന്റെ ആവശ്യങ്ങള് കണക്കിലെടുത്ത് പൊതുവിതരണ സമ്പ്രദായം കൂടുതല് ശക്തിപ്പെടുത്താനും മതിയായ ധാന്യം നല്കാനും സാധിക്കുന്ന സമഗ്ര ഭക്ഷ്യ നയമാണ് കേന്ദ്രത്തിനുള്ളതെന്ന് മന്ത്രിമാര് പറഞ്ഞതായി കുമ്മനം വ്യക്തമാക്കി.
കേന്ദ്രം സംസ്ഥാനത്തിന് ആവശ്യത്തിന് അരി നല്കുന്നില്ലെന്ന പരാതി വസ്തുതാവിരുദ്ധമാണ്. ഭക്ഷ്യഭദ്രതാ നിയമം നടപ്പാക്കുന്നതിന് സംസ്ഥാന സര്ക്കാര് അടിയന്തര നടപടി സ്വീകരിക്കണമെന്നും മന്ത്രിമാര് ആവശ്യപ്പെട്ടു.
