ന്യൂദല്ഹി: പ്രധാനമന്ത്രി നരേന്ദ്ര മോദിയുടെ സമൂഹമാധ്യമങ്ങളിലെ പ്രവര്ത്തനങ്ങള്ക്ക് യാതൊരു വിധത്തിലുള്ള ചെലവുകളുമില്ലെന്ന് പ്രധാനമന്ത്രിയുടെ ഓഫീസ് വ്യക്തമാക്കി. എഎപി നേതാവും ദല്ഹി ഉപമുഖ്യമന്ത്രിയുമായ മനീഷ് സിസോദിയയുടെ ആരോപണങ്ങളോട് പ്രതികരിക്കുകയായിരുന്നു പ്രധാനമന്ത്രിയുടെ ഓഫീസ്.
പ്രധാനമന്ത്രിയുടെ ഔദ്യോഗിക മൊബൈല് ആപ്ലിക്കേഷനായ പിഎംഒ ഇന്ത്യയ്ക്ക് രൂപം നല്കിയത് വിദ്യാര്ത്ഥികളാണ്. MyGov സംഘടിപ്പിച്ച മത്സരത്തില് പങ്കെടുത്താണ് വിദ്യാര്ത്ഥികള് മൊബൈല് ആപ്ലിക്കേഷന് രൂപം നല്കിയത്. അതു കൊണ്ട് തന്നെ സമ്മാന തുക ഒഴിച്ച് ഇതിന് യാതൊരു വിധ ചെലവും വന്നിട്ടില്ല.
പ്രധാനമന്ത്രിയുടെ ഓഫീസിന്റെ വെബ്സൈറ്റുകള് കൈകാര്യം ചെയ്യുന്നത് പ്രധാനമന്ത്രിയുടെ ഓഫീസാണ്. ആപ്പിനെ കൈകാര്യം ചെയ്യുന്നത് പിഎംഒ ആണ്. പ്രധാനമന്ത്രിയുടെ ഓഫീസിന്റെ (www.pmindia.gov.in) രൂപകല്പ്പനയും കൈകാര്യവും പിഎംഒയ്ക്കാണ്.
പ്രധാനമന്ത്രിയുടെ മറ്റ് സമൂഹമാധ്യമങ്ങളും കൈകാര്യം ചെയ്യുന്നത് പിഎംഒ ആണ്. എന്നാല് ഇതിന് പ്രത്യേക ചെലവുകളൊന്നും ഉണ്ടാകാറില്ല. ഈ സമൂഹമാധ്യമങ്ങളിലൂടെ (ട്വിറ്റര്, ഫെയ്സ്ബുക്ക്, യു ട്യൂബ്) പാര്ട്ടിയുമായി ബന്ധപ്പെട്ട യാതൊരു വിധത്തിലുള്ള പ്രചരണവും നടത്തുന്നില്ലെന്നും ഓഫീസ് അറിയിച്ചു.
നേരത്തെ പ്രധാനമന്ത്രിയുടെ സമൂഹമാധ്യമങ്ങളുമായി ബന്ധപ്പെട്ട് ഉണ്ടാകുന്ന ചെലവുകളുടെ വര്ഷം തോറുമുള്ള കണക്കുകള് സിസോദിയ ആവശ്യപ്പെട്ടിരുന്നു. ഇതിന് മറുപടിയായാണ് പ്രധാനമന്ത്രിയുടെ ഓഫീസ് ചെലവുകളുടെ വിശദീകരണം നടത്തിയത്.
