തളിപ്പറമ്പ്: വില്പനക്കായി കടത്തുകയായിരുന്ന ഒന്നരക്കിലോ കഞ്ചാവുമായി തളിപ്പറമ്പില് നാലുപേര് പിടിയിലായി. കണ്ണൂര് സിറ്റി ജുമാ മസ്ജിദിന് സമീപത്തെ വട്ടക്കുന്നുമ്മല് നസീര് (43), ഇരിക്കൂറിലെ കുരിയാലച്ചിറ വീട്ടില് സുരേഷ് കുമാര് (43) എന്നിവരെയും ഇവരില് നിന്നും കഞ്ചാവ് വാങ്ങാനെത്തിയ രണ്ടുപേരെയുമാണ് അറസ്റ്റുചെയ്തത്.
ഇന്നലെ രാവിലെ മന്ന ടാഗോര് സ്കൂളിന് സമീപത്ത് വെച്ചാണ് സംഘം പിടിയിലായത്. തമിഴ്നാട്ടിലെ കമ്പംതേനിയില് നിന്നും കഞ്ചാവ് ജില്ലയിലെത്തിച്ച് വിവിധ മേഖലകളില് വിതരണം ചെയ്യുന്ന ഏജന്റുമാരില് പ്രധാനികളാണ് പിടിയിലായ നസീറും സുരേഷ് കുമാറും. തളിപ്പറമ്പ് നഗരത്തിലും മലയോര മേഖലകളിലും വില്പന നടത്താനാണ് ഇവര് കഞ്ചാവ് എത്തിച്ചത്. പ്രതിമാസം ചുരുങ്ങിയത് അഞ്ച് കിലോവിലധികം കഞ്ചാവ് ഈ മേഖലയില് വിറ്റഴിക്കുന്നുണ്ടെന്ന് പോലീസ് ചോദ്യം ചെയ്യലില് ഇവര് വ്യക്തമായിട്ടുണ്ട്.
ആഴ്ചകളായി തളിപ്പറമ്പ് പോലീസിന്റെ നിരീക്ഷണത്തിലായിരുന്നു ഇവര്. ഇന്നലെ രാവിലെ കഞ്ചാവുമായി സ്കൂട്ടറില് പോകുന്നതിനിടയിലാണ് സംഘം പിടിയിലായത്. സംഘത്തലവനായ മറ്റൊരാള് ഓടിരക്ഷപ്പെട്ടതായും സൂചനയുണ്ട്. ഇതര സംസ്ഥാന തൊഴിലാളികള്, കോളേജ് വിദ്യാര്ത്ഥികള് എന്നിവരെ കേന്ദ്രീകരിച്ച് കഞ്ചാവ് വില്പന നടത്തുന്ന നിരവധി സംഘങ്ങള് ജില്ലയിലുണ്ട്.
കര്ണ്ണാടക, തമിഴ്നാട് തുടങ്ങിയ സംസ്ഥാനങ്ങളില് നിന്നും കിലോവിന് പതിനഞ്ചായിരം രൂപ നിരക്കില് കഞ്ചാവ് വാങ്ങി ഇവിടെ നാലും അഞ്ചും ഇരട്ടി വിലക്കാണ് സംഘം വിറ്റഴിക്കുന്നത്. പോലീസ് പ്രതികളെ കോടതിയില് ഹാജരാക്കി.
