ന്യൂദല്ഹി: മുന്പ് മോദിയോട് പുലര്ത്തിയിരുന്ന കഠിനമായ വിരോധം കേരളത്തിലെ മുസ്ലിങ്ങള്ക്കിടയില് കുറയുകയാണോ? മോദിയ്ക്ക് മുസ്ലിങ്ങളോടല്ല, ഇസ്ലാമിക തീവ്രവാദത്തോടാണ് വിരോധമെന്ന വസ്തുത കുറെപ്പേര് തിരിച്ചറിഞ്ഞ് തുടങ്ങിയോ?
ഏറ്റവുമൊടുവില് ഒരു മുസ്ലിം ചെറുപ്പക്കാരന് ഇന്ത്യയോടും മോദി സര്ക്കാരിനോടും പ്രകടിപ്പിക്കുന്ന കൂറും സ്നേഹവും വലിയ ചര്ച്ചാവിഷയമാവുകയാണ്. താന് എപ്പോഴും ഭാരത് മാതാ കീ ജയ് വിളിക്കുമെന്നും വന്ദേമാതരം പാടുമെന്നുമാണ് ഈ യുവാവ് വീഡിയോയില് പറയുന്നത്. മോദി സര്ക്കാരിനെ വെറുക്കുന്ന മുസ്ലിം യുവാക്കളെ ഇയാള് ചീത്തവിളിക്കുകയും ചെയ്യുന്നു. കഠിനമായ കാലാവസ്ഥയിലും അതിര്ത്തി കാക്കുന്ന ഇന്ത്യയിലെ ജവാന്മാരെ ഓര്ക്കുന്നുണ്ടെന്നും അതിനാണ് താന് നാല് നേരം സമാധാനത്തോടെ ഭക്ഷണം കഴിക്കുന്നതെന്നും ഇയാള് വീഡിയോയില് പറയുന്നു. ഈ വീഡിയോ വൈറലായി പ്രചരിക്കുന്നു.
ലക്ഷദ്വീപിലെ മുന് എംപി മുഹമ്മദ് ഫൈസല് കടുത്ത മോദി വിരോധിയായിരുന്നു. ലക്ഷദ്വീപില് ചില പദ്ധതികള് നടപ്പിലാക്കാന് മോദിയുടെ അനുചരന്മാരില് ഒരാളായ പ്രഫുല് കോഡ പട്ടേലിനെ ലക്ഷദ്വീപിലെ അഡ്മിനിസ്ട്രേറ്ററായി അയച്ചപ്പോള് അന്ന് എംപിയായിരുന്ന മുഹമ്മദ് ഫൈസലിന്റെ നേതൃത്വത്തില് വലിയ സമരം നടന്നു. സേവ് ലക്ഷദ്വീപ് എന്ന പേരില് സിനിമക്കാരെക്കൂടി അണിനിരത്തി വലിയൊരു സമരം നടത്തുന്നതിന് സിനിമാസംവിധായിക കൂടിയായ ഐഷ സുല്ത്താന സമരം നടത്തി. പക്ഷെ ഈ മുഹമ്മദ് ഫൈസല് ഇപ്പോള് ബിജെപിയില് ചേരാന് പോകുന്നു എന്ന വാര്ത്തയാണ് പുറത്തുവരുന്നത്. ലക്ഷദ്വീപില് മോദി നടപ്പാക്കാന് പോകുന്ന ബൃഹദ് പദ്ധതികള് രാജ്യരക്ഷയ്ക്കും രാജ്യവികസനത്തിനും വേണ്ടിയാണ്, അല്ലാതെ ദ്വീപ് നിവാസികളായ മുസ്ലിങ്ങള്ക്ക് എതിരല്ല എന്ന് മുഹമ്മദ് ഫൈസല് മനസ്സിലാക്കിക്കഴിഞ്ഞു.
അതുപോലെ ഐഷ സുല്ത്താനയും മോദി സര്ക്കാരിനെതിരായ സമരങ്ങളെല്ലാം അവസാനിപ്പിച്ചു. അവര് ലക്ഷദ്വീപില് ജോലിക്ക് വന്ന ഐഎഎസ് ഉദ്യോഗസ്ഥനായ ഹര്ഷിദ് സെയ്നിയെ വിവാഹം കഴിച്ച് ദല്ഹിയില് പോയി. ഇപ്പോള് സുഖകരമായ കുടുംബജീവിതവുമായി ദല്ഹിയിലെ അസിസ്റ്റന്റ് കളക്ടറായ ഹര്ഷിദ് സെയ്നിക്കൊപ്പം സസുഖം വാഴുകയാണ് ഐഷ സുല്ത്താന. നേരത്തെ മോദിയെ നിരന്തരം ചീത്ത വിളിക്കുന്ന, ബിജെപിയ്ക്കെതിരെ കടുത്ത വിമര്ശനം പറഞ്ഞിരുന്ന ഐഷ സുല്ത്താനയുടെ ഫെയ്സ്ബുക്കിലോ ഇന്സ്റ്റഗ്രാമിലോ ഇപ്പോള് അത്തരം പോസ്റ്റുകള് കാണാനില്ല. അതിനാല് തന്നെ അവരുടെ പോസ്റ്റുകള് ലൈക്കടിക്കാനും മോദി, ബിജെപി വിരോധകമന്റുകള് ഇടാനും ആരും എത്താറില്ല.
മുസ്ലിംലീഗിന്റെ തീപ്പൊരി നേതാവായ കെ.എം.ഷാജിയിലെ മാറ്റമാണ് അമ്പരപ്പിക്കുന്നത്. മോദിയെ നാഴികയ്ക്ക് നാല്പത് വട്ടം ചീത്തവിളിച്ചിരുന്ന കെ.എം. ഷാജി എന്ന തദ്ദേശസ്വയംഭരണ മന്ത്രി ഇപ്പോള് പറയുന്നത് താന് പ്രധാനമന്ത്രിയുടെ ധനസഹായത്തില് നിര്മ്മിക്കുന്ന വീടുകളില് മോദിയുടെ ചിത്രം വെയ്ക്കാന് തയ്യാറാണെന്നാണ്. കേരളത്തിലെ മുസ്ലിങ്ങള്ക്കിടയില് മോദിയോടുണ്ടായിരുന്ന തീവ്രമായ വെറുപ്പ് കുറയുകയാണോ?
