ന്യൂദല്ഹി: ഇന്ത്യന് സൈന്യത്തിനെതിരായ സിപിഎം നേതാക്കളുടെ അവഹേളനങ്ങളില് പ്രതിഷേധിച്ച് ദല്ഹി എകെജി ഭവനിലേക്ക് ഹിന്ദു സേനാ പ്രവര്ത്തകര് ഇരച്ചുകയറി. പത്രസമ്മേളനത്തിനെത്തിയ ജനറല് സെക്രട്ടറി സീതാറാം യെച്ചൂരിയുടെ തൊട്ടടുത്ത് വരെയെത്തിയ രണ്ട് പ്രവര്ത്തകര് സിപിഎം മൂര്ദ്ദാബാദ് മുദ്രാവാക്യം വിളിച്ചു. ഇവരെ ഓഫീസുണ്ടായിരുന്ന സിപിഎഎമ്മുകാര് മര്ദ്ദിച്ച് പോലീസിന് കൈമാറി. ഹിന്ദു സേനക്കാര്ക്കെതിരെ കേസെടുത്തതായി പോലീസ് അറിയിച്ചു.
പോളിറ്റ് ബ്യൂറോ യോഗ തീരുമാനങ്ങള് വിശദീകരിക്കാന് വിളിച്ചു ചേര്ത്ത പത്രസമ്മേളനത്തിന് മുന്പാണ് നാടകീയ സംഭവങ്ങള്. വാര്ത്താ സമ്മേളനത്തിനായി യച്ചൂരി രണ്ടാം നിലയിലെ ഹാളിലേക്ക് വരുമ്പോള് രണ്ട് പേര് ഇരുവശത്തുമായി നിന്ന് സിപിഎം വിരുദ്ധ മുദ്രാവാക്യങ്ങള് വിളിച്ചു. നിങ്ങളാരാണെന്ന് യച്ചൂരി ചോദിച്ചപ്പോള് സമീപത്തുണ്ടായിരുന്ന സിപിഎം പ്രവര്ത്തകര് മര്ദ്ദനമാരംഭിച്ചു. ഇതിനിടെ ഒരാള് പുറത്തേക്കോടി. ഇയാളെ പോലീസ് പിടികൂടി. മറ്റൊരാളെ സമീപത്തെ മുറിയില് പൂട്ടിയിട്ട പതിനഞ്ച് മിനിട്ടോളം ക്രൂരമായി മര്ദ്ദിച്ച് പോലീസിന് കൈമാറി. പോലീസിന്റെ മുന്നില്വെച്ചും മര്ദ്ദനം തുടര്ന്നു. സിപിഎം രാജ്യവിരുദ്ധ പാര്ട്ടിയാണെന്നും അതില് പ്രതിഷേധിക്കാനാണ് എത്തിയതെന്നും വിളിച്ചു പറഞ്ഞ ഇവര് ഇന്ത്യന് സൈന്യത്തിന് ജയ് വിളിച്ചു.
പ്രതിഷേധക്കാര് തന്നെ ഒന്നും ചെയ്തില്ലെന്നും നിങ്ങളാണ് തടഞ്ഞതെന്നും ഇത് സംബന്ധിച്ച മാധ്യമപ്രവര്ത്തകരുടെ ചോദ്യത്തിന് മറുപടിയായി യച്ചൂരി പത്രസമ്മേളനത്തില് പറഞ്ഞു. സംഭവം നടക്കുമ്പോള് മാധ്യമപ്രവര്ത്തകര് കൂട്ടത്തോടെ ഹാളിന് പുറത്തേക്കോടിയതിനാല് യച്ചൂരിക്ക് അകത്തേക്ക് കടക്കാനായിരുന്നില്ല. മറ്റൊരാളുടെ സഹായത്തോടെയാണ് അദ്ദേഹം അകത്ത് പ്രവേശിച്ചത്. പ്രതിഷേധമുണ്ടാകുമെന്ന മുന്നറിയിപ്പിനെ തുടര്ന്ന് കനത്ത സുരക്ഷയാണ് എകെജി ഭവന് ഒരുക്കിയിരുന്നത്. ഇത് മറികടന്ന പ്രതിഷേധക്കാര് ഇരച്ചുകയറിയത് പോലീസിനെയും അമ്പരപ്പിച്ചു.
പട്ടാളക്കാര് ബലാത്സംഗം ചെയ്യുന്നവരും കൊലപാതകികളുമാണെന്ന് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന് അടുത്തിടെ പ്രസംഗിച്ചിരുന്നു. കശ്മീരിലെ വിഘടനവാദികളെ പിന്തുണച്ചും കരസേനാ മേധാവിയെ വിമര്ശിച്ചും പ്രകാശ് കാരാട്ടും പ്രസ്താവന നടത്തിയിരുന്നു.
