കൊല്ലം: സാധാരണക്കാരന് എളുപ്പത്തില് സേവനം ലഭിക്കാനുള്ള ഇടമായി പോസ്റ്റ് ഓഫീസുകളെ മാറ്റുകയാണ് കേന്ദ്ര സര്ക്കാരിന്റെ ലക്ഷ്യമെന്ന് കേന്ദ്ര സഹമന്ത്രി പൊന് രാധാകൃഷ്ണന് പറഞ്ഞു. ഇതിന്റെ ഭാഗമായാണ് പോസ്റ്റ് ഓഫീസുകളെ പാസ്പോര്ട്ട് സേവാ കേന്ദ്രങ്ങള്, ഡെബിറ്റ് കാര്ഡ്, എടിഎം സേവനങ്ങള്, ഡിജിറ്റല് പണമിടപാട് തുടങ്ങിയ സംവിധാനങ്ങളിലൂടെ ആധുനികവല്ക്കരിച്ചതെന്ന് അദ്ദേഹം ചൂണ്ടിക്കാട്ടി.
നൂറനാട്, വള്ളിക്കുന്നം, പൂത്തൂര് പോസ്റ്റ് ഓഫീസ് മന്ദിരങ്ങള് പൂത്തൂരില് ഉദ്ഘാടനം ചെയ്യുകയയാിരുന്നു അദ്ദേഹം. കാലന് കുടയും കാക്കി ഡ്രസുമായി വീട്ടിലെത്തുന്ന പോസ്റ്റ്മാന് ആയിരിക്കില്ല ഇനിയുള്ളത്.
സേവനങ്ങള്ക്ക് ആവശ്യമായ ഡിജിറ്റല് ഉപകരണങ്ങളുമായി ആയിട്ടായിരിക്കും അവര് വീട്ടിലെത്തുക. അതാണ് പ്രധാനമന്ത്രി നരേന്ദ്ര മോദി ലക്ഷ്യമിടുന്ന ഡിജിറ്റല് ഇന്ത്യ. സാധാരണക്കാരനായി നടപ്പാക്കുന്ന പദ്ധതികളിലധികവും നടപ്പാക്കുന്നത് ഈ സംവിധാനത്തിലൂടെയാണ്.
കേന്ദ്ര സര്ക്കാരിന്റെ സുകന്യസമൃദ്ധിയോജന, അടല് പെന്ഷന്യോജന, ജീവന് ജ്യോതി യോജന പോലുള്ള പദ്ധതികള് സാധാരണക്കാരിലേക്ക് എത്തിക്കുന്നതില് പോസ്റ്റ് ഓഫീസുകളുടെ പങ്ക് വലുതാണ്. പൊന് രാധാകൃഷ്ണന് പറഞ്ഞു.
കൊടിക്കുന്നില് സുരേഷ് എംപി. അദ്ധ്യക്ഷനായിരുന്നു. കെ. സോമപ്രസാദ് എംപി, ചീഫ് പോസ്റ്റ്മാസ്റ്റര് ജനറല് എം. സമ്പത്ത്, ബിജെപി ജില്ലാപ്രസിഡന്റ് ജി. ഗോപിനാഥ്, ജനപ്രതിനിധികളായ ആര്. രശ്മി, അനില്കുമാര്, ധന്യകൃഷ്ണന്, വിനോദിനി .ജെ.കെ, പോസ്റ്റ്മാസ്റ്റര് ജനറല് സുമതി രവിചന്ദ്രന് എന്നിവര് സംസാരിച്ചു.
