ഹരിപ്പാട്: കഴിഞ്ഞ രണ്ട് ദിവസമായി അനുഭവപ്പെട്ടുകൊണ്ടിരിക്കുന്ന ശക്തമായ കടലാക്രമണത്തില് ആറാട്ടുപുഴ – തൃക്കുന്നപ്പുഴ ഭാഗത്ത് വ്യാപകമായ നാശനഷ്ടം.
തീരദേശ റോഡിന്റെ പടിഞ്ഞാറ് ഭാഗത്തായി കടലിനോട് ചേര്ന്ന് നിന്ന നിരവധി വീടുകളുടെ മതിലുകളും ഭിത്തികളും ശക്തമായ കടല്കയറ്റത്തില് തകര്ന്നു.
ഇന്നലെ രാവിലെയും രാത്രിയിലുമായി നിരവധി തെങ്ങുകളും കടപുഴുകി. ഇതേ രീതിയില് കടലാക്രമണം ശക്തമായി അനുഭവപ്പെട്ടാല് തീരദേശ വാസികളുടെ വീടുകളും വസ്തുവകകളും കടലെടുക്കുമെന്ന അവസ്ഥയിലാണ്.
ആറാട്ടുപുഴ-മംഗലം ഭാഗത്തേക്കുള്ള തീരദേശ റോഡിലും വെള്ളം കയറിയിട്ടുണ്ട്. കടലാക്രമണത്തെ ചെറുക്കാനുള്ള ശാശ്വതമായ പരിഹാരം കണ്ടെത്തണമെന്നാവശ്യപ്പെട്ട് തീരദേശവാസികള് കഴിഞ്ഞ ദിവസം റോഡ് ഉപരോധിച്ചുവെങ്കിലും റവന്യു, പോലീസ്, ഇറിഗേഷന് വകുപ്പുകള് ഇവര്ക്ക് നല്കിയ വാഗ്ദാനങ്ങളൊന്നും നടപ്പാക്കാനുള്ള യാതൊരു നടപടിയും ഇതുവരെയും സ്വീകരിച്ചിട്ടില്ല.
കടലാക്രമണ കെടുതിയില്പ്പെട്ടവരെ രക്ഷിക്കാനുള്ള നടപടികള് സ്വീകരിച്ചില്ലെങ്കില് പ്രക്ഷോഭ പരിപാടികള് ശക്തമാക്കാനാണ് തീരദേശവാസികളുടെ തീരുമാനം.
