കോഴിക്കോട്: യോഗാചാര്യന്മാരുടെയും 25ലധികം യോഗകേന്ദ്രങ്ങളുടെയും സംയുക്ത നേതൃത്വത്തില്‍ ജില്ലയില്‍ വിവിധ സ്ഥലങ്ങളില്‍ 21ന് അന്താരാഷ്‌ട്രയോഗ ദിനാചാരണം നടത്തുമെന്ന് ഭാരവാഹികള്‍ വാര്‍ത്താസമ്മേളനത്തില്‍ പറഞ്ഞു.
ദിനാചരണത്തിന്റെ ഭാഗമായി യോഗ പരിശീലനത്തിന് നേതൃത്വം നല്കുന്ന പരിശീലകരുടെ ശില്പശാലകള്‍ നടന്നു. കോര്‍പ്പറേഷന്‍ പരിധിയില്‍ 100 പരിശീലകരാണ് ശില്പശാലയില്‍ പങ്കെടുത്തത്. റസിഡന്‍സ് അസോസിയേഷനുകള്‍, യുവജന ക്ലബ്ബുകള്‍, വായനശാലകള്‍, വിദ്യാലയങ്ങള്‍ തുടങ്ങിയവയുടെ നേതൃത്വത്തില്‍ ആരംഭിക്കുന്ന യോഗ പരിശീലനങ്ങള്‍ക്ക് ആവശ്യമായ പരിശീലകരെ സൗജന്യമായി സംഘാടക സമിതി നല്‍കും. വനിതകള്‍ക്കും കുട്ടികള്‍ക്കും പ്രത്യേകമാണ് ക്ലാസുകള്‍. 14ന് ആരംഭിക്കുന്ന പരിശീലനം 19ന് സമാപിക്കും.
21ന് രാവിലെ ഏഴിന് ഇന്‍ഡോര്‍ സ്‌റ്റേഡിയം, ജൂബിലി ഹാള്‍, സ്‌നോഹാഞ്ജലി ഹാള്‍, എന്നിവിടങ്ങളില്‍ യോഗ പ്രദര്‍ശനം നടക്കും. ഇന്‍ഡോര്‍ സ്റ്റേഡിയത്തില്‍ നടക്കുന്ന പരിപാടിയില്‍ ജില്ലാ കലക്ടര്‍ പങ്കെടുക്കും. യോഗക്ലാസുകള്‍ സംഘടിപ്പിക്കാന്‍ താത്പര്യമുള്ളവര്‍ 9446975090, 9497679211 തുടങ്ങിയ ഫോണ്‍ നമ്പറുകളില്‍ ബന്ധപ്പെടണം.
യോഗദിനാചാരണം വിജയിപ്പിക്കുന്നതിന് വിപുലമായ സംഘാടക സമിതി രൂപീകരിച്ചിട്ടുണ്ട്. ജില്ലാ കലക്ടര്‍ യു.വി. ജോസാണ് രക്ഷാധികാരി. പട്ടയില്‍ പ്രഭാകരന്‍ അദ്ധ്യക്ഷനും എം. ജയരാജ് ജനറല്‍ കണ്‍വീനറുമാണ്.
വാര്‍ത്തസമ്മേളനത്തില്‍ പട്ടയില്‍ പ്രഭാകരന്‍, യോഗാചാര്യ ഉണ്ണിരാമന്‍ മാസ്റ്റര്‍, യോഗാചാര്യ വിജയരാഘവന്‍, യോഗാചാര്യ ഡോ. ആത്മദേവ്, യോഗാചാര്യ ശരത്കുമാര്‍, കണ്‍വീനര്‍ വി. ജയരാജ് തുടങ്ങിയവര്‍ പങ്കെടുത്തു.
