ബര്മിങ്ഹം: ചാമ്പ്യന്സ് ട്രോഫി ക്രിക്കറ്റില് അയല്ക്കാരും ചിരവൈരികളുമായി പാക്കിസ്ഥാനെ തകര്ത്തെറിഞ്ഞ ടീം അംഗങ്ങളെ നായകന് കോഹ്ലി പ്രശംസകൊണ്ടു മൂടി. മത്സരത്തില് യുവരാജിന്റെ തകര്പ്പന് ഇന്നിങ്സാണ് കളിയുടെ ഗതിമാറ്റിയതെന്നും ക്യാപ്റ്റന് കൂട്ടിച്ചേര്ത്തു. മത്സരത്തില് യുവിക്കൊപ്പം എല്ലാവരും തങ്ങളുടേതായ പങ്കുവഹിച്ചുവെന്നും കോഹ്ലി വ്യക്തമാക്കി.
രോഹിത് ശര്മ്മ പുറത്തായശേഷം ക്രീസിലെത്തിയ യുവരാജ് തന്റെ സമ്മര്ദ്ദങ്ങള് മുഴുവന് ഇല്ലാതാക്കുന്ന വിധത്തിലാണ് ബാറ്റ് വീശിയത്. മികച്ച പന്തുകള്, എന്തിന് യോര്ക്കറുകള് പോലും ഗ്യാലറിയിലെത്തിക്കാന് യുവിക്ക് കഴിഞ്ഞു. യുവരാജിന് ഒറ്റയ്ക്ക് മത്സരത്തിന്റെ ഗതിതന്നെ മാറ്റിമറിക്കാന് കഴിയും. സമീപകാലത്ത് ഇന്ത്യയുടെ ഏറ്റവും മികച്ച ബാറ്റിങ്ങാണ് പാക്കിസ്ഥാനെതിരെ കണ്ടതെന്നും ക്യാപ്റ്റന് പറഞ്ഞു. 32 പന്തുകളില് നിന്ന് എട്ട് ഫോറും ഒരു സിക്സറുമടക്കം 53 റണ്സെടുത്താണ് യുവി മടങ്ങിയത്.
ചാമ്പ്യന്സ് ട്രോഫിയില് ഇന്ത്യന് താരത്തിന്റെ ഏറ്റവും വേഗതയേറിയ അര്ദ്ധസെഞ്ചുറിയും ഇനി യുവിയുടെ പേരില്. പ്രകടനത്തിനുള്ള അംഗീകാരത്തിനായി യുവിയെ തേടി മാന് ഓഫ് ദി മാച്ച് ബഹുമതിയും എത്തി.എന്നാല് ബാറ്റ്സ്മാന്മാരും ബൗളര്മാരും അവസരത്തിനൊത്തുയര്ന്ന് മിന്നുന്ന പ്രകടനം നടത്തിയെങ്കിലും ഫീല്ഡിംഗില് ഇനിയും ഏറെ മെച്ചപ്പെടാനുണ്ട്. ഫീല്ഡിങ് കൂടി മെച്ചപ്പെടുത്തിയാല് ചാമ്പ്യന്സ് ട്രോഫി നേടാനാകുമെന്ന് ഉറച്ച വിശ്വാസമുണ്ടെന്നും ഇന്ത്യന് നായകന് വ്യക്തമാക്കി. മൂന്ന് വിക്കറ്റ് വീഴ്ത്തിയ പേസര് ഉമേഷ് യാദവിനെയും രണ്ട് വീതം വിക്കറ്റുകള് വീഴ്ത്തിയ ഹാര്ദിക് പാണ്ഡ്യ, രവീന്ദ്ര ജഡേജ എന്നിവരെയും ക്യാപ്റ്റന് പ്രത്യേകം അഭിനന്ദിച്ചു.
അതേസമയം ഓഫ് സ്പിന്നര് അശ്വിനെ ഒഴിവാക്കിയതിന്റെയും ബാറ്റിങ് ഓര്ഡറില് ധോണിക്ക് മുന്പില് ഹാര്ദിക് പാണ്ഡ്യയെ ഇറക്കിയതിന്റെയും കാരണവും കോഹ്ലി വ്യക്തമാക്കി. പാക് താരങ്ങള് സ്പിന്നിനെ മികച്ച രീതിയില് നേരിടുന്നവരാണെന്നും അങ്ങനെയുള്ളപ്പോള് ഫാസ്റ്റ് ബൗളറെ കളിപ്പിക്കുന്നതാണ് നല്ലതെന്ന് തോന്നുകയും ചെയ്തതിനാലാണ് അശ്വിനെ മാറ്റിനിര്ത്തിയതെന്ന് കോഹ്ലി പറഞ്ഞു. മത്സരം ജയിക്കണമെങ്കില് ഇത്തരം ചില നിര്ണ്ണായക തീരുമാനങ്ങള് എടുക്കേണ്ടി വരുമെന്നും കൂട്ടിച്ചേര്ത്തു.
