കൊച്ചി: ഭാരതം പോലുള്ള രാജ്യങ്ങളിലെ വികസന പ്രവര്ത്തനങ്ങള്ക്കെതിരേ പരിസ്ഥിതി പ്രശ്നം ഉന്നയിക്കുന്നവര്ക്ക് ധനസഹായം ചെയ്യുന്നവര്ക്കു പിന്നില് അരബ് പെട്രോളിയം കയറ്റുമതി സംഘങ്ങളുടെ ഗൂഢാലോചനയുണ്ടെന്ന് പ്രജ്ഞാ പ്രവാഹ് ദേശീയ കോര്ഡിനേറ്റര് ജെ. നന്ദകുമാര്. പി. പരമേശ്വരന്റെ നവതിയാഘോഷത്തോടനുബന്ധിച്ച് നടന്ന ദേശീയ വികസനവും പരിസ്ഥിതിയും സെമിനാറില് സംസാരിക്കുകയായിരുന്നു.വികസനവും പരിസ്ഥിതിയും ഒന്നിച്ചു പോകില്ലെന്ന ധാരണയാണ് ചിലര് പരത്തുന്നത്. ഇത് ശരിയല്ല. രണ്ടും ഒന്നിച്ചു പോകുന്ന സംവിധാനമാണുണ്ടാകേണ്ടത്. സാധിക്കില്ലെന്നത് ആധുനികമെന്നു പറയുന്ന വൈദേശിക സങ്കല്പ്പമാണ്. സാധിക്കുമെന്ന് ഭാരതീയ സങ്കല്പ്പവും പ്രയോഗവും കാട്ടിത്തന്നിട്ടുണ്ട്, നന്ദകുമാര് പറഞ്ഞു.
കമ്മ്യൂണിസത്തില് പ്രകൃതിയുടെ അസ്തിത്വത്തിന് ഒരുകാലത്തും സ്ഥാനമുണ്ടായിട്ടില്ല. മാര്ക്സ് പ്രകൃതിയെ ജൈവമായി കണ്ടിട്ടുതന്നെയില്ല. പ്രകൃതിയെ കീഴടക്കുകയെന്നതാണ് അവരുടെ കാഴ്ചപ്പാട്. എന്നാല് സമഗ്ര ജീവിത ദര്ശനമായ ഹിന്ദുത്വത്തില് പ്രകൃതിയും മനുഷ്യനും തമ്മിലുള്ള സംയോജനമാണ്. അതാണ് ശരിയായ വികസനത്തിന്റെ വഴി. അര നൂറ്റാണ്ടോളം തുടര്ന്ന കാഴ്ചപ്പാടു മാറ്റി പുതിയ സര്ക്കാരും നയങ്ങളും പ്രകൃതിയെ ദോഹനം ചെയ്യുന്ന സങ്കല്പ്പത്തിലേക്കു മാറിക്കൊണ്ടിരിക്കുകയാണ്, അദ്ദേഹം പറഞ്ഞു.
ഒരുകാല് ഭൂമിയില് ഊന്നി, മറുകാല് മുന്നോട്ടു വെക്കുന്നതാണ് പുരോഗതിയിലേക്കുള്ള നടത്തം. ഭൂമിയിലെ കാല് പൈതൃകത്തിലും പാരമ്പര്യത്തിലും ഊന്നിക്കൊണ്ടുള്ളതാകണം എന്നാണത് അര്ത്ഥമാക്കുന്നത്. വികസനത്തിന്റെ കാര്യത്തില് പാശ്ചാത്യരുടെയും ഇടതരുടെയും (വെസ്റ്റ് ആന്ഡ് ലെഫ്റ്റ്) ചതിക്കുഴികളില് വീഴരുത്, നന്ദകുമാര് പറഞ്ഞു.
