ചെങ്ങന്നൂര്: പ്രകൃതിശക്തികളെ ഭയന്ന് ആദിമ മനുഷ്യന് നടത്തിയ വിലാപങ്ങളോ ആരാധനയോ അല്ല വേദമന്ത്രങ്ങള് എന്നും പൂര്ണത തേടിയുള്ള മാനവഹൃദയങ്ങളുടെ സമഗ്രമായ അന്വേഷണത്തിന്റെ സഫലതയാണതെന്നും ഡോ. ലളിതാശര്മ അഭിപ്രായപ്പെട്ടു.
വേദപണ്ഡിതന് നരേന്ദ്രഭൂഷണിന്റെ എണ്പതാം ജയന്തിആഘോഷങ്ങളുടെ ഭാഗമായി നടന്ന പ്രഭാഷണ പരമ്പരയില് ശ്രീരുദ്രം വൈദിക വ്യാഖ്യാനത്തിന്റെ സാകാരസ്വരൂപങ്ങള് എന്ന വിഷയത്തില് പ്രഭാഷണം നടത്തുകയായിരുന്നു അവര്. മാനവജീവിതം ഭൗതികതയ്ക്ക് മാത്രമോ ആധ്യാത്മികതയ്ക്ക് മാത്രമോ പ്രാധാന്യം നല്കുന്ന ഒന്നല്ല. ഇവയെ സമന്വയിപ്പിച്ച് പൂര്ണതിയിലേക്ക് ജീവിതം എത്തിക്കുന്നതിനാണ് ഭാരതീയ ഗുരുപരമ്പര ശ്രമിച്ചിട്ടുള്ളതെന്നും അവര് പറഞ്ഞു.
ഇന്ന് വൈകിട്ട് അഞ്ചിന് പ്രാചീന ഭാരതത്തിലെ നിര്മ്മാണശാസ്ത്രം എന്ന വിഷയത്തില് ഡോ. എ. മോഹനാക്ഷന് നായര് പ്രഭാഷണം നടത്തും.
