മലപ്പുറം: പോലീസ് കോണ്സ്റ്റബിള് റാങ്ക് ലിസ്റ്റിന്റെ കാലാവധി അവസാനിക്കാന് ദിവസങ്ങള് മാത്രമിരിക്കെ ആയിരക്കണക്കിന് ഉദ്യോഗാര്ത്ഥികള് ആശങ്കയില്. 2016 ജനുവരിയില് നിലവില് വന്ന പോലീസ് കോണ്സ്റ്റബിള് റാങ്ക് ലിസ്റ്റിന്റെ കാലാവധി ജൂണ് 20ന് അവസാനിക്കും. 9041 പേര് ഉള്പ്പെട്ട ലിസ്റ്റില് 2567 പേര്ക്കാണ് നിയമനം ലഭിച്ചത്. തിരുവനന്തപുരം, മലപ്പുറം, എറണാകുളം, തൃശ്ശൂര്, പത്തനംതിട്ട, കാസര്ഗോഡ്, ഇടുക്കി എന്നീ എഴ് ബറ്റാലിയനുകളിലാണ് നിയമനം നടക്കേണ്ടത്.
മെയിന് ലിസ്റ്റില് 5804 പേരുണ്ട്. സംവരണ സമുദായത്തിനായി സപ്ലിമെന്ററി ലിസ്റ്റില് 3237 പേര്. കാസര്ഗോഡ് ജില്ലക്കാരാണ് ലിസ്റ്റില് കൂടുതല്- 1721. കുറവ് പത്തനംതിട്ടയില്- 946 പേര്.
തൃശ്ശൂര് ബറ്റാലിയനില് 595 നിയമനങ്ങള് നടന്നു. കുറവ് നിയമനങ്ങള് നടന്നത് എറണാകുളം ബറ്റാലിയനിലാണ് 217 പേര്. മറ്റു ബറ്റാലിയനുകളിലെ കണക്ക് ഇങ്ങനെ തിരുവനന്തപുരം- 467, മലപ്പുറം- 258, പത്തനംതിട്ട- 383, കാസര്ഗോഡ്- 376, ഇടുക്കി- 250.
സാധാരണ മുഖ്യ പട്ടികയിലെ മുഴുവന് പേരെയും നിയമിക്കുകയാണ് പതിവ്. ഒഴിവുകള് റിപ്പോര്ട്ട് ചെയ്യുന്നതില് അധികൃതര് കാണിച്ച അനാസ്ഥയാണ് ഉദ്യോഗാര്ത്ഥികളുടെ പ്രതീക്ഷകള്ക്ക് മങ്ങലേല്പ്പിച്ചത്. റിപ്പോര്ട്ട് ചെയ്യാന് ബാക്കിയുള്ളവയോടൊപ്പം പ്രതീക്ഷിത ഒഴിവുകള് കൂടി പരിഗണിച്ച് ജോലി നല്കണമെന്നും പുതിയ വിജ്ഞാപനം വരാത്ത സാഹചര്യത്തില് കാലാവധി നീട്ടണമെന്നുമാണ് ഉദ്യോഗാര്ത്ഥികളുടെ ആവശ്യം.
