കാഞ്ഞങ്ങാട്: വര്ത്തമാന കാലത്തിന്റെ മൂല്യച്യുതിയെ പ്രതിരോധിക്കാന് ഗ്രാമീണ നന്മകള് തിരിച്ചുപിടിക്കണമെന്ന് ഫോക് ലോര് അക്കാദമി മുന്ചെയര്മാന് പ്രൊഫ. മുഹമ്മദ് അഹമ്മദ് പറഞ്ഞു. മാവുങ്കാല് നെല്ലിത്തറ സ്വാമി രാംദാസ് സ്മാരക സരസ്വതി വിദ്യാമന്ദിരത്തില് ബാലഗോകുലം സംസ്ഥാന ബാലമിത്ര ശില്പശാല ഉദ്ഘാടനം ചെയ്യുകയായിരുന്നു അദ്ദേഹം.
ഇന്നത്തെ വിദ്യാഭ്യാസ രീതിക്ക് തന്നെ പൊളിച്ചെഴുത്ത് അനിവാര്യമാണ്. വ്യത്യസ്ത തലത്തിലുള്ള വിദ്യാഭ്യാസ സമ്പ്രദായമാണ് നടപ്പാക്കുന്നത്. നാട്ടറിവ് ഉണ്ടാക്കാന് ഗ്രാമങ്ങളിലെ വിദ്യാലയങ്ങള്ക്ക് സാധിക്കുന്നു. സംസ്കാരിക പൈതൃകം ദര്ശിക്കാന് സാധിക്കുന്നത് ഗ്രാമങ്ങളിലെ കുട്ടികളില് മാത്രമാണ്. ഭാരതീയ സംസ്കാരമെന്നു പറയുന്നത് സര്വ്വ മതങ്ങളുടേയും അന്തസത്തയാണ്. നമ്മുടെ ഗ്രാമങ്ങള് ഇല്ലാതായാല് സംസ്കാരം തന്നെ നശിച്ചു പോകും. അതു നിലനിര്ത്തുകയെന്നത് ദൗത്യമായി ഏറ്റെടുത്ത് അന്യം നിന്നു പോകുന്ന നമ്മുടെ നാടിന്റെ സത്ത് തിരിച്ചു പിടിക്കാന് സംസ്കാരിക പ്രസ്ഥാനമെന്ന നിലയ്ക്ക് ബാലഗോകുലത്തിന് സാധിക്കുമെന്നും മുഹമ്മദ് അഹമ്മദ് പറഞ്ഞു.
ബാലഗോകുലം സംസ്ഥാന അദ്ധ്യക്ഷന് കെ.പി. ബാബുരജന് മാസ്റ്റര് അദ്ധ്യക്ഷത വഹിച്ചു. നീലമന ശങ്കരന് സംബന്ധിച്ചു. സ്വാഗത സംഘം പൊതുകാര്യദര്ശി കുഞ്ഞമ്പു മേലത്ത് സ്വാഗതവും ബാലഗോകുലം ജില്ല കാര്യദര്ശി ജയരാമന് മാടിക്കാല് നന്ദിയും പറഞ്ഞു. 6ന് സമാപിക്കുന്ന ശില്പശാലയില് വിവിധ വിഷയങ്ങളില് ക്ലാസ് നടക്കും. 5ന് വൈകുന്നേരം സമാപന സമ്മേളനം കേന്ദ്ര സര്വ്വകലാശാല വൈസ് ചാന്സലര് ജി.ഗോപകുമാര് ഉദ്ഘാടനം ചെയ്യും.
