ഗുവഹാത്തി : ആസമില് പരസ്യമായി ഗോമാംസം കൊണ്ടുനടന്നതിന് പ്രായപൂര്ത്തിയാകാത്തയാള് ഉള്പ്പടെ മൂന്നുപേര് അറസ്റ്റില്. ഗുവഹാത്തിയില് നിന്നും 300 കിലോമീറ്റര് ദൂരെയുള്ള ജോര്ഹത് ഏരിയയില് പരസ്യമായി അരക്കിലോ ഗോമാംസം കൊണ്ടു നടന്നതിനാണ് ഇവര് അറസ്റ്റിലായത്. മതപരമായ വിശ്വാസങ്ങളെ വ്രണപ്പെടുത്താന് ശ്രമിച്ചെന്ന കുറ്റത്തിലാണ് ഇയാളെ അറസ്റ്റ് ചെയ്തിരിക്കുന്നത്.
ഇതില് രണ്ടുപേര് നിര്മാണത്തൊഴിലാളികളാണ്. പ്രായപൂര്ത്തിയാകാത്തയാള് നഗരത്തിലെ കടയില് കവറുമായി എത്തിയപ്പോള് കടയുടമ കവറിനുള്ളില് എന്താണെന്ന് ചോദിച്ചപ്പോള് ഇയാള് ഗോമാംസമാണെന്ന് പറഞ്ഞ് ഇത് പരസ്യമായി പുറത്തെടുക്കുകയായിരുന്നു. കൂടാതെ മൂവരും നാംഘറിലെ പ്രാര്ത്ഥന സ്ഥലത്തിനു തൊട്ടടുത്തായി ആളുകളെ പ്രകോപിപ്പിക്കുന്ന വിധത്തില് ഗോമാംസം പ്രദര്ശിപ്പിച്ചതായും റിപ്പോര്ട്ടുണ്ട്. തുടര്ന്ന് പ്രദേശത്തുള്ളവര് ഇതുസംബന്ധിച്ച് പോലീസില് പരാതി നല്കുകയായിരുന്നു.
കോടതിയില് ഹാജരാക്കിയ പ്രതികളില് രണ്ടുപേരെ ജുഡീഷ്യല് കസ്റ്റഡിയില് വിട്ടു. പ്രായപൂര്ത്തിയാകാത്തയാളെ ജുവനൈല് ഹോമിലും പാര്പ്പിച്ചിരിക്കുകയാണ്. ആറുമാസം വരെ തടവ് ലഭിക്കാവുന്നകുറ്റമാണ് ഇവര്ക്കെതിരെ ചുമത്തിയിരിക്കുന്നത്. പ്രദേശത്തെ മാംസവ്യാപാരിയില് നിന്നാണ് ഇവര്ക്കിത് ലഭിച്ചതെന്ന് ചോദ്യം ചെയ്യലില് പ്രതികള് മൊഴി നല്കിയിട്ടുണ്ട്. ഈ കടയുടമയ്ക്ക് അംഗീകാരമുള്ളതാണോയെന്നത് സംബന്ധിച്ചും പോലീസ് അന്വേഷിക്കുന്നുണ്ട്.
