രാജ്കോട്ട്: ഐപിഎല്ലില് മൂന്നാം കിരീടം ലക്ഷ്യമിട്ട് ആദ്യ പോരാട്ടത്തിനിറങ്ങുന്ന കൊല്ക്കത്ത നൈറ്റ് റൈഡേഴ്സിന് ഇന്ന് ഗുജറാത്ത് ലയണ്സിന്റെ വെല്ലുവിളി.
2012, 14 സീസണുകളില് ഗൗതം ഗംഭീറിന്റെ നായകത്വത്തിലാണ് നൈറ്റ് റൈഡേഴ്സ് ഐപിഎല്ലില് കിരീടം നേടിയിട്ടുള്ളത്. കഴിഞ്ഞ വര്ഷം പ്ലേ ഓഫില് കളിച്ചെങ്കിലും സണ്റൈസേഴ്സിനോട് തോറ്റ് നാലാമതായി. മറുവശത്ത് സുരേഷ് റെയ്നയുടെ നേതൃത്വത്തിലുള്ള ഗുജറാത്ത് ലയണ്സും തികഞ്ഞ ആത്മവിശ്വാസത്തിലാണ്. കഴിഞ്ഞ വര്ഷം ആദ്യമായി പങ്കെടുത്ത് ലീഗ് റൗണ്ടില് ഒന്നാമതെത്തിയവരാണ് അവര്.
മികച്ച താരനിരയാണ് ഗുജറാത്ത് ലയണ്സിന്റെ കരുത്ത്. ഇന്ത്യയുടെ ഏറ്റവും മികച്ച ട്വന്റി 20 താരങ്ങില് ഒരാളായ സുരേഷ് റെയ്ന നയിക്കുന്ന ടീമില് ഓരോ സ്ഥാനങ്ങളിലേക്കും ഒന്നിലേറെ മികച്ച താരങ്ങളാണുള്ളത്. ഓപ്പണറായി ആരോണ് ഫിഞ്ചിനൊപ്പം ബ്രണ്ടന് മക്കല്ലവും ജാസണ് റോയിയുണ്ട്. എങ്കിലും മക്കല്ലത്തിനായിരിക്കും നറുക്കുവീഴാന് സാധ്യത.
രാജ്യാന്തര ക്രിക്കറ്റില്നിന്നു വിരമിച്ചതിനാല് മക്കല്ലത്തിന്റെ സേവനം സീസണ് മുഴുവന് ലഭിക്കുമെന്നുള്ളത് ഗുജറാത്തിനെ സംബന്ധിച്ചത്തോളം ആശ്വാസം പകരുന്ന കാര്യമാണ്. മൂന്നാം നമ്പറില് ക്യാപ്റ്റന് സുരേഷ് റെയ്നയും പിന്നാലെ ദിനേഷ് കാര്ത്തിക്കും ഉള്പ്പെടുമ്പോള് ബാറ്റിങ് ഏറെ കരുത്തുറ്റതാകും. ലോകത്തെ ഏറ്റവും മികച്ച രണ്ട് ഓള്റൗണ്ടര്മാരായ രവീന്ദ്ര ജഡേജയുടെയും ഡ്വെയ്ന് ബ്രാവോയുടെയും സാന്നിധ്യവും ലയണ്സിന്റെ കരുത്ത് വര്ധിപ്പിക്കും.
മുനാഫ് പട്ടേല്, ധവാല് കുല്ക്കര്ണി, ഇഷന് കിഷന്, പ്രവീണ്കുമാര്, ആന്ഡ്രൂ ടൈ എന്നിവരാണ് ടീമിലെ പ്രധാന ബൗളര്മാര്. ഒപ്പം മലയാളി താരം ബേസില് തമ്പിയും.
ദക്ഷിണാഫ്രിക്കയുടെ ജാക്ക് കല്ലിസിന്റെ പരിശീലനത്തിന് കീഴിലാണ് ഇത്തവണ കൊല്ക്കത്ത പടയൊരുക്കം നടത്തിയിട്ടുള്ളത്. മികച്ച ബാറ്റ്സ്മാന്മാരും ഓള്റൗണ്ടര്മാരും ബൗളര്മാരുമടങ്ങുന്നതാണ് ഗംഭീറിന്റെ സംഘം. ഐപിഎലില് സ്ഥിരം മികച്ച ഫോം പുലര്ത്തുന്ന ഗൗതം ഗംഭീര് നയിക്കുന്ന ബാറ്റിങ് നിരയില് മനീഷ് പാണ്ഡെ, റോബിന് ഉത്തപ്പ, യൂസഫ് പഠാന്, സൂര്യകുമാര് യാദവ് എന്നിവര് പ്രധാനികള്. ഷക്കീബ് അല് ഹസന്റെ ഓള്റൗണ്ട് മികവും കോല്ക്കത്തയ്ക്കു മികച്ച പ്രകടനം കാഴ്ചവയ്ക്കാന് സഹായകമാകുമെന്നു തീര്ച്ച. സുനില് നരേന്, പിയൂഷ് ചൗള എന്നിവരടങ്ങുന്ന സ്പിന് നിര ഐപിഎല്ലിലെ ഏറ്റവും മികച്ചത് എന്നുതന്നെ വേണം പറയാന്. എന്നാല് ബംഗ്ലാദേശിന്റെ ഷാക്കിബ് അല് ഹസ്സന് ആദ്യ രണ്ട് മത്സരങ്ങള് കളിക്കാന് കഴിയില്ല. ശ്രീലങ്കന് പര്യടനത്തിലാണ് താരം.
ആന്ദ്രേ റസലിന്റെ അഭാവമാണ് കൊല്ത്തയെ ഏറെ വലയ്ക്കുന്ന കാര്യം. ബാറ്റ് കൊണ്ടും പന്തുകൊണ്ടും അത്ഭുതങ്ങള് കാണിക്കാന് കഴിവുള്ള റസല് കഴിഞ്ഞ സീസണില് കൊല്ക്കത്തയുടെ കുതിപ്പിന് ഏറെ സംഭാവന നല്കിയിരുന്നു. റസലിനു പകരം ക്രിസ് വോക്സിനെ ടീമിലെത്തിച്ചെങ്കിലും റസലിന്റെ വിടവ് നികത്താനാകുമോയെന്ന് കാത്തിരുന്നു കാണാം. മികച്ച പേസര്മാരും അവര്ക്ക് സ്വന്തം.
ട്രെന്റ് ബോള്ട്ട്, നഥാന് കള്ട്ടര്നീല്, ഉമേഷ് യാദവ് എന്നിവര് പേസിലെ പ്രധാനികള്. ഉമേഷ് യാദവിന് പരിക്കുകാരണം ആദ്യ രണ്ട് മത്സരങ്ങളില് കളിക്കാനാവില്ല. സ്പിന് നിയന്ത്രിക്കുക വിന്ഡീസിന്റെ സുനില് നരേയ്ന്. ഒപ്പം പിയൂഷ് ചൗള, കുല്ദീപ് യാദവ് എന്നിവരും ഉള്പ്പെടുമ്പോള് എതിരാളികള്ക്ക് നൈറ്റ് റൈഡേഴ്സിനെ ഭയക്കാതെ പറ്റില്ല.
