സൂറിച്ച്: ഇന്ത്യന് ഫുട്ബോള് ടീമിന് ഫിഫ റാങ്കിങ്ങില് വന് കുതിപ്പ്. 31 സ്ഥാനങ്ങള് മുന്നോട്ടുകയറിയ ഇന്ത്യ ഇന്നലെ പ്രഖ്യാപിച്ച ഏറ്റവും പുതിയ റാങ്കിങ്ങില് 101-ാം സ്ഥാനത്താണ്. കഴിഞ്ഞ രണ്ട് ദശകത്തിനിടെ ഇന്ത്യയുടെ ഏറ്റവും മികച്ച റാങ്കാണിത്. കഴിഞ്ഞ മാസത്തെ റാങ്കിങ്ങില് ഇന്ത്യ 132-ാം സ്ഥാനത്തായിരുന്നു. ഏഷ്യന് മേഖലാ റാങ്കിങ്ങില് ഇന്ത്യ 11-ാം സ്ഥാനത്തേക്കും ഉയര്ന്നു. നിക്വരാഗെ, ലിത്വാനിയ, എസ്റ്റോണിയ എന്നീ രാജ്യങ്ങളും ഇന്ത്യക്കൊപ്പം 101-ാം സ്ഥാനത്തുണ്ട്.
സൗഹൃദ മത്സരത്തില് കംബോഡിയക്കെതിരെയും എഎഫ്സി കപ്പ് യോഗ്യതാ മത്സരത്തില് മ്യാന്മറിനെതിരെയും നേടിയ ജയങ്ങളാണ് ഇന്ത്യയ്ക്ക് തുണയായത്. കഴിഞ്ഞ പതിമൂന്ന് മത്സരങ്ങളില് പതിനൊന്നിലും ടീം ജയിച്ചു. ഇതില് ആറെണ്ണം തുടര്ച്ചയായ ജയങ്ങളാണ്.
1996 ഫെബ്രുവരിയില് നേടിയ 94-ാം സ്ഥാനമാണ് റാങ്കിങ്ങില് ഇതുവരെയുള്ള ഇന്ത്യയുടെ ഏറ്റവും വലിയ നേട്ടം.
ഇതേവര്ഷം ഏപ്രിലില് ഇന്ത്യ 100-ാം സ്ഥാനത്തും എത്തി. 1993 ആണ് ഇന്ത്യ മികച്ച പ്രകടനം കാഴ്ചവെച്ച മറ്റൊരു വര്ഷം. 1993 നവംബറില് 99-ാം സ്ഥാനത്തും ഒക്ടോബര്, ഡിസംബര് മാസങ്ങളില് 100-ാം സ്ഥാനത്തും ഇന്ത്യ എത്തിയിരുന്നു. എന്നാല് 1996ന് ശേഷം റാങ്കിങ്ങില് വന് തിരിച്ചടിയായിരുന്നു ഇന്ത്യയ്ക്ക്. 2015 ഫെബ്രുവരിയില് സ്റ്റീഫന് കോണ്സ്റ്റന്റൈന് പരിശീലകനായി ചുമതലയേറ്റെടുക്കുമ്പോള് ഇന്ത്യ 171-ാം സ്ഥാനത്തായിരുന്നു. അതേവര്ഷം മാര്ച്ചില് ഇന്ത്യ 173-ാം സ്ഥാനത്തേക്ക് വീഴുകയും ചെയ്തു.
ജൂണ് ഏഴിന് സൗഹൃ മത്സരത്തില് ലെബനനെ ഇന്ത്യ നേരിടുന്നുണ്ട്. ജൂണ് 13ന് എഎഫ്സി യോഗ്യതാ മത്സരത്തില് കിര്ഗിസ്ഥാനെയും നേരിടും. ഈ രണ്ട് മത്സരങ്ങളും ജയിച്ചാല് ഇന്ത്യക്ക് റാങ്കിങ്ങില് വീണ്ടും മുന്നേറാന് കഴിയും.
അതേസമയം അര്ജന്റീനയെ പിന്തള്ളി രണ്ടാംസ്ഥാനത്തുണ്ടായിരുന്ന ബ്രസീല് ഒന്നാമതെത്തി. ലോകകപ്പ് യോഗ്യതാ റൗണ്ടിലെ മോശം പ്രകടനത്തിനു പിന്നാലെയുണ്ടായ റാങ്കിങ് തിരിച്ചടി അര്ജന്റീനക്ക് ഇരട്ട പ്രഹരമായി. മൂന്നും നാലും സ്ഥാനങ്ങള് ജര്മ്മനിയും ചിലിയും നിലനിര്ത്തിയപ്പോള് രണ്ടു സ്ഥാനങ്ങള് മെച്ചപ്പെടുത്തി കൊളംബിയ അഞ്ചാമതെത്തി.
ഫ്രാന്സ് ആറാം സ്ഥാനത്ത് തുടര്ന്നപ്പോള് ബെല്ജിയം രണ്ട് സ്ഥാനം താഴോട്ടറിങ്ങി ഏഴാമതായി. പോര്ച്ചുഗല്, സ്വിറ്റ്സര്ലന്ഡ്, സ്പെയിന് എന്നിവരാണ് ആദ്യ പത്തിലുള്ള മറ്റു ടീമുകള്.
ഏഷ്യന് മേഖലയില് 28-ാമതുള്ള ഇറാനാണ് ഒന്നാമത്. ദക്ഷിണ കൊറിയ, ജപ്പാന്, ഓസ്ട്രേലിയ, സൗദി അറേബ്യ എന്നീ രാജ്യങ്ങളാണ് രണ്ടു മുതല് അഞ്ച് സ്ഥാനങ്ങളില്.
