കേന്ദ്രമന്ത്രിസഭാ തീരുമാനം വന്നയുടന് ന്യൂദല്ഹിയില് കേന്ദ്രമന്ത്രിമാരുടെ വാഹനങ്ങളില് നിന്ന് ബീക്കണ് ലൈറ്റ് നീക്കം ചെയ്യുന്നു
ന്യൂദല്ഹി: ചുവന്ന ലൈറ്റുമിട്ടു പാഞ്ഞുപോകുന്ന മന്ത്രി വാഹനങ്ങള് എന്ന ആലങ്കാരികമായ പ്രയോഗം ഇനി അവസാനിപ്പിക്കാം. ഔദ്യോഗിക വാഹനങ്ങളില് ഘടിപ്പിക്കുന്ന ചുവപ്പു ബീക്കണ് പൂര്ണമായി നിരോധിക്കാന് കേന്ദ്ര സര്ക്കാര് തീരുമാനിച്ചു.
പ്രസിഡന്റും പ്രധാനമന്ത്രിയും അടക്കമുള്ള വിഐപികളുടെ വാഹനങ്ങളില് ഇനി ചുവപ്പു ബീക്കണ് ഘടിപ്പിക്കില്ല. കനത്ത ട്രാഫിക്കില് യാത്രാ തടസം ഒഴിവാക്കന് പോലീസ്, ഫയര്ഫോഴ്സ്, സൈന്യം, ആംബുലന്സ് വാഹനങ്ങളില് നീല ബീക്കണ് ഉപയോഗിക്കാം. കേന്ദ്ര മന്ത്രിസഭാ യോഗത്തിനു ശേഷം ഗതാഗത മന്ത്രി നിതിന് ഗഡ്കരി അറിയിച്ചതാണിത്.
ഏറ്റവും അത്യാവശ്യമുള്ള ഘട്ടങ്ങളിലല്ലാതെ ഒരു വാഹനത്തിലും ചുവപ്പു ബീക്കണ് ഉപയോഗിക്കാന് പാടില്ല എന്ന ചരിത്രപരമായ തീരുമാനം അറിയിക്കുന്നു എന്നാണ് ഗഡ്കരി പറഞ്ഞത്. ഇതു സംബന്ധിച്ച വിജ്ഞാപനം മെയ് ഒന്നിന് നിലവില് വരും. എന്നാല്, മന്ത്രിസഭാ തീരുമാനം വന്നയുടന് കേന്ദ്രമന്ത്രിമാര് വാഹനങ്ങളില് നിന്ന് ബീക്കണ് ലൈറ്റുകള് മാറ്റി.
പ്രസിഡന്റ്, വൈസ് പ്രസിഡന്റ്, പ്രധാനമന്ത്രി, ചീഫ് ജസ്റ്റിസുമാര്, മുഖ്യമന്ത്രിമാര്, കേന്ദ്രമന്ത്രിമാര് തുടങ്ങി എല്ലാ തലങ്ങളിലും ഈ നിരോധനം ബാധകം.
മന്ത്രിമാരും സര്ക്കാര് ഉദ്യോഗസ്ഥരും വാഹനങ്ങളില് ചുവപ്പു ബീക്കണ് ഉപയോഗിക്കുന്നത് അസംബന്ധമെന്നും അധികാര ദുര്വിനിയോഗമെന്നും 2013ല് സുപ്രീംകോടതി വ്യക്തമാക്കിയിരുന്നു. സ്റ്റാറ്റസ് സിംബല് മാത്രം എന്നാണ് കോടതി ബീക്കണ് സമ്പ്രദായത്തെ വിശേഷിപ്പിച്ചത്.
അന്നു മുതല് ബീക്കണ് ഒഴിവാക്കുന്നതു സംബന്ധിച്ച് വിവിധ തലങ്ങളില് ചര്ച്ച തുടരുകയായിരുന്നു. അടുത്തിടെ പഞ്ചാബ്, ഉത്തര്പ്രദേശ് മുഖ്യമന്ത്രിമാര് തങ്ങളുടെ വാഹനങ്ങളില് നിന്ന് ബീക്കണ് ഒഴിവാക്കി. അതിനു പിന്നാലെയാണ് കേന്ദ്ര സര്ക്കാരിന്റെ തീരുമാനം.
