തമിഴ്‌നാട് -ബംഗാള്‍ ഫൈനല്‍

പറവൂര്‍: ദേശീയ ജൂനിയര്‍ വോളിബോള്‍ ചാമ്പ്യന്‍ഷിപ്പിന്റെ സെമിഫൈനലില്‍ കേരളത്തിന്റെ പെണ്‍കുട്ടികള്‍ പൊരുതിത്തോറ്റു.നാലു സെറ്റു നീണ്ട ഉശിരന്‍ പോരാട്ടത്തില്‍ തമിഴ്‌നാട് 20-25,25-17, 25-22,25-23 എന്ന സ്‌കോറിന് ജയിച്ചുകയറി.

ഇന്ന് നടക്കുന്ന ഫൈനലില്‍ തമിഴ്‌നാട് ബംഗാളിനെ നേരിടും.തമിഴ്‌നാടിനെതിരേ തകര്‍പ്പന്‍ കളിയാണ് കേരളം പുറത്തെടുത്തത്.കാണികളുടെ പിന്തുണയോടെ പൊരുതിയ കേരളം ആദ്യ സെറ്റ് 25-20 ന് സ്വന്തമാക്കി.എന്നാല്‍ തുടക്കത്തിലെ മികവ് നിലനിര്‍ത്താനായില്ല.തുടര്‍ന്നുളള മൂന്ന് സെറ്റുകളില്‍ പൊരുതിക്കയറി തമിഴ്‌നാട് പെണ്‍കുട്ടികള്‍ വിജയം നേടി.

രാജസ്ഥാനെ തോല്‍പ്പിച്ചാണ് ബംഗാള്‍ പെണ്‍കുട്ടികള്‍ ഫൈനലിലെത്തിയത്.സ്‌കോര്‍ 25-15, 25-19,25-14.

തമിഴ്‌നാടിന്റെ ആണ്‍കുട്ടികളും ഫൈനലില്‍ കടന്നു.സെമിയില്‍ അവര്‍ നേരിട്ടുളള സെറ്റുകള്‍ക്ക് ചാണ്ഡിഗഡിനെ തോല്‍പ്പിച്ചു.സ്‌കോര്‍ 25-17,25-18,25-16.

തമിഴ്‌നാടിനെതിരേ ചാണ്ഡിഗഡ് തുടക്കത്തില്‍ പൊരുതിനിന്നെങ്കിലും അവസാന നിമിഷങ്ങളില്‍ അവര്‍ക്ക് തകര്‍ന്നു.ആദ്യ സെറ്റില്‍ 17 പോയിന്റു മാത്രമാണ് അവര്‍ക്ക് നേടാനായത്.രണ്ടാം സെറ്റിന്റെ തുടക്കത്തിലും ചാണ്ഡിഗഡ് പൊരുതി.എന്നാല്‍ 25-18 ന് തമിഴ്‌നാട് സെറ്റ് സ്വന്തമാക്കി. നിര്‍ണായകമായ മൂന്നാം സെറ്റില്‍ ചാണ്ഡിഗഡ് അനായാസം കീഴടങ്ങി.

പെണ്‍കുട്ടികളുടെ ആദ്യ സെമിയില്‍ ബംഗാളിനെതിരേ രാജസ്ഥാന് പിടിച്ചു നില്‍ക്കാനായില്ല.തകര്‍ത്തുകളിച്ച ബംഗാള്‍ അനായാസം ഫൈനലിലേക്ക് മാര്‍ച്ച് ചെയ്തു.ആദ്യ സെറ്റില്‍ അവര്‍ 15 പോയിന്റാണ് രാജസ്ഥാന് നല്‍കിയത്.അതേസമയം രണ്ടാം സെറ്റില്‍ രാജസ്ഥാന്‍ ഉണര്‍ന്നു കളിച്ചു.എന്നാല്‍ അവസാന നിമിഷങ്ങളില്‍ തകര്‍ന്നടിഞ്ഞു.19 പോയിന്റു വിട്ടുകൊടുത്ത് ബംഗാള്‍ രണ്ടാം സെറ്റും കീശയിലാക്കി. മൂന്നാം സെറ്റില്‍ ബംഗാള്‍ അനായാസം ജയിച്ചുകയറി.