തിരുവനന്തപുരം ലക്ഷ്മിഭായ് നാഷണല് കോളേജ് ഓഫ് ഫിസിക്കല് എഡ്യുക്കേഷനില് കളരിപ്പയറ്റ് ദേശീയ ശില്പശാലയുടെ ഉദ്ഘാടനചടങ്ങില് കേന്ദ്ര കായിക മന്ത്രി വിജയ് ഗോയലും സംസ്ഥാന കായിക മന്ത്രി എ.സി. മൊയ്തീനും വാളും പരിചയും എടുത്തപ്പോള്. ഒ.രാജഗോപാല് എംഎല്എ, ബിജെപി ജില്ലാ പ്രസിഡന്റ് അഡ്വ. എസ്. സുരേഷ്, സായി പ്രിന്സിപ്പല് ഡോ. ജി. കിഷോര് എന്നിവര് സമീപം
തിരുവനന്തപുരം: ഉത്തേജക മരുന്നുകള് ഉപയോഗിക്കുന്നത് ക്രിമിനല് കുറ്റമാക്കി നിയമം കൊണ്ടുവരുമെന്ന് കേന്ദ്ര കായിക മന്ത്രി വിജയ് ഗോയല്. സ്പോര്ട്സ് അതോറിറ്റി ഓഫ് ഇന്ത്യയുടെ കീഴിലുള്ള തിരുവനന്തപുരം ലക്ഷമീഭായ് നാഷണല് കോളേജ് ഓഫ് ഫിസിക്കല് എഡ്യുക്കേഷനില് 21 കോടിയുടെ വികസനപ്രവര്ത്തനങ്ങളുടെയും കളരിപ്പയറ്റ് ദേശീയ ശില്പശാലയുടെയും ഉദ്ഘാടനം നിര്വ്വഹിക്കുകയായിരുന്നു അദ്ദേഹം.
ഗ്രാമങ്ങളിലെയും വനവാസിമേഖകളിലെയും മികച്ച കായികശേഷിയുള്ള കുട്ടികളെ കണ്ടെത്തി കായികരംഗത്തേക്ക് വളര്ത്തിയെടുക്കാനാണ് സര്ക്കാര് ലക്ഷ്യമിടുന്നത്. ഇതിനായി കേന്ദ്ര കായിക മന്ത്രാലയം ‘സ്പോര്ട്സ് മിനിസ്ട്രീസ് ടാലെന്റ് സെര്ച്ച്’ എന്ന പോര്ട്ടല് ആരംഭിച്ചിട്ടുണ്ട്. കോഴിക്കോട് യൂണിവേഴ്സിറ്റിയില് ഫുട്ബോള് പരിശീലന കേന്ദ്രം തുടങ്ങും. മാനസികവും ശാരീരികാരോഗ്യവും പ്രധാനം ചെയ്യുന്ന ഏക ആയോധനകലയായ കളരപ്പയറ്റിനെ ഒളിമ്പിക്സിലെ മത്സര ഇനമാക്കാന് ശ്രമിക്കുമെന്നും അദ്ദേഹം പറഞ്ഞു.
സംസ്ഥാന കായിക മന്ത്രി എ.സി. മൊയ്തീന് അദ്ധ്യക്ഷനായിരുന്നു. ഒ. രാജഗോപാല് എംഎല്എ, ഡോ.എ. സമ്പത്ത് എംപി, കായിക വകുപ്പ് സെക്രട്ടറി ഡോ.ബി.അശോക്, സ്പോര്ട്്സ് കൗണ്സില് സെക്രട്ടറി ഡോ. സഞ്ജയന്കുമാര്, സായി പ്രിന്സിപ്പല് ഡോ. ജി. കിഷോര്, വിദേശ പരിശീലക ഡോ. അലെസ്സാന്ഡ്രിയ മരിയ പിന്റോ പെരേര, ഇന്ത്യന് കളരിപ്പയറ്റ് ഫെഡറേഷന് ജനറല് സെക്രട്ടറി അഡ്വ. പൂന്തുറ സോമന്, ബിജെപി ജില്ലാ പ്രസിഡന്റ് അഡ്വ. എസ്.സുരേഷ്, തുടങ്ങിയവര് സംബന്ധിച്ചു.
